Aqmola oblysynda kóktemgi sý tasqyny saldarynan ondaǵan eldi meken zardap shekti. Ulysmedia.kz málimetinshe, óńirde 70-ten astam turǵyn úıdi sý basyp qaldy. Qaýipti jaǵdaıǵa baılanysty keı aýdandarda tótenshe jaǵdaı jarııalanýy múmkin, dep habarlaıdy "Adyrna" ulttyq portaly.
Tótenshe jaǵdaılar mınıstrliginiń habarlaýynsha, Astrahan aýdanynyń Jańaturmys, Kolýton, Staryı Kolýton, Iagodnoe eldi mekenderi men Atbasar aýdanynyń A.Qurmanov aýylynda 69 úıdi sý basqan. Bulandy aýdanynyń Novobratskoe aýylynda taǵy 29 aýla aýmaǵy sý astynda qalǵan.
Qaýipsizdik maqsatynda 383 adam evakýaııalandy. Olardyń 10-y ýaqytsha ornalastyrý pýnktilerine jaıǵastyrylsa, 159 adam týystarynyń úıinde turyp jatyr. Qazirgi ýaqytta 214 adam úılerine oralǵan.
Sý tasqyny jol qozǵalysyna da keri áserin tıgizdi. Oblys aýmaǵyndaǵy 26 jol ýchaskesin sý shaıyp ótse, 5 ýchaske múlde jaramsyz bolyp qalǵan. 14 eldi mekenge kólik qatynasy toqtap tur.
Mınıstrlik qazirgi ýaqytta tórt oblysty – Aqmola, Soltústik Qazaqstan, Shyǵys Qazaqstan jáne Abaı oblystaryn – erekshe baqylaýǵa alǵanyn málimdedi. Degenmen, bıylǵy sý tasqyny qaýpi ótken jylmen salystyrǵanda áldeqaıda tómen ekeni aıtyldy.
Eske sala keteıik, buǵan deıin Atbasar men Makınsk qalalarynda da sý tasqynyna baılanysty qıyn jaǵdaı oryn alǵan bolatyn. Áleýmettik jelilerde taraǵan beınematerıaldarda úılerdiń jartysyna deıin sý kirip ketkeni baıqalady. Turǵyndardyń aıtýynsha, mundaı jaǵdaı ár kóktem saıyn qaıtalanýda. 19 naýryzda Makınsk qalasyndaǵy mektep sý tasqyny saldarynan qashyqtan oqytý formatyna kóshirilgen.
