Túrkistan qalasynda Uly Jeńistiń 80 jyldyǵyna oraı uıymdastyrylǵan Qazaqstan Respýblıkasynyń VI Jastar sport oıyndarynyń resmı ashylý saltanaty ótti. Bıylǵy oıyndar Jeńistiń 80 jyldyǵy qarsańynda ótkizilip jatyr. Keshendi jarys 24 aqpan men 1 qazan aralyǵynda sporttyń 34 túrinen uıymdastyrylýda. Atalǵan dodaǵa 2000-nan astam sportshy qatysady.
Túrkistan qalasyndaǵy «Túrkistan Arena» stadıonynda ótken ashylý rásimine Qazaqstan Respýblıkasy Týrızm jáne sport mınıstri Erbol Myrzabosynov, Túrkistan oblysynyń ákimi Nuralhan Kósherov, Astana, Almaty, Shymkent qalalary men oblystardyń dene shynyqtyrý jáne sport basqarmalarynyń basshylary, sondaı-aq sport salasynyń qurmetti mamandary qatysty.
Erbol Myrzabosynov ashylý saltanatynda sóılegen sózinde mundaı jarystar jas sportshylar úshin aıryqsha mańyzǵa ıe ekenin atap ótti.
– Barshańyzdy kıeli Túrkistan topyraǵynda kórgenime qýanyshtymyn! Qazaqstan Respýblıkasynyń VI Jastar sport oıyndaryna qosh keldińizder! Bıylǵy oıyndar Jeńistiń 80 jyldyǵy qarsańynda ótip jatyr. Ata-babalarymyz surapyl soǵysta eren erlik kórsetip, bizge búgingi beıbit kúndi syılady. Batyrlardyń erligi men eńbegin umytpaýymyz kerek. Ózderińiz biletindeı, Memleket basshysy sport salasynyń damýyna erekshe nazar aýdaryp keledi. Sonyń nátıjesinde otandyq sporttyń deńgeıi jyldan jylǵa artyp keledi. Bizdiń sportshylar halyqaralyq jarystarda jarqyn jetistikterge jetip, el abyroıyn asqaqtatyp júr. Al Jastar sport oıyndary sııaqty keshendi is-sharalar otandyq sportty jańa deńgeıge kóterýge serpin beredi. Sondaı-aq jas urpaqty salamatty ómir saltyn ustanýǵa baýlıdy. Bıylǵy básekede baǵy men baby qatar shapqan eń úzdik sportshylar jeńis tuǵyrynan kórinedi dep senemin, – dedi Týrızm jáne sport mınıstri.
Túrkistan oblysynyń ákimi Nuralhan Kósherov óńirde sport salasy qarqyndy damyp jatqanyn atap ótti.
– Tarıhı shaharǵa qosh keldińizder! Memleket basshysy Qasym-Jomart Kemeluly sport salasyn jan-jaqty damytýdy tapsyrǵan bolatyn. Osyǵan oraı, búgin Túrkistan qalasynda VI Jastar oıyndary bastaldy. Bul – el bolashaǵy sanalatyn jastarymyzdyń sheberligin shyńdap, jańa chempıondar tárbıeleıtin mańyzdy jarys. Bıylǵy dodaǵa elimizdiń barlyq óńirinen 2 myńnan astam jas sportshy qatysýda. Al Túrkistan oblysynan sporttyń 34 túrinen 300-den astam sportshy qatysady. Mundaı iri is-sharanyń Túrkistanda ótýi zańdylyq. Sebebi aımaqta sport ınfraqurylymy jaqsy damyp jatyr. Buqaralyq sportty damytý maqsatynda 2024 jyly 73 sport nysanynyń qurylysy aıaqtaldy. 2025 jyly zamanaýı úlgidegi 51 sporttyq nysan paıdalanýǵa beriledi. Onyń ishinde atshabar men eskek esý kanaly bar. Sizder sport saıystarynda oblys qana emes, tutas Qazaq eliniń namysyn qorǵaısyzdar. Bul jarys arqyly úlken belesterge qadam jasaısyzdar. Aralaryńyzdan Álem, Olımpıada chempıondary shyǵa bersin! Barshańyzǵa ádil báseke, sáttilik jáne jarqyn jeńister tileımin! – dedi Nuralhan Kósherov.
VI Jastar sport oıyndary elimizdiń barlyq óńirlerinde ótedi. Onyń ishinde Túrkistanda basketboldan, baıdarkada jáne kanoede esý sport túrleri boıynsha uıymdastyrylady.
Aıta keteıik, bıylǵy Qazaqstan Respýblıkasynyń VI Jastar sport oıyndary QR Dene shynyqtyrý men sportty damytýdyń 2023-2029 jyldarǵa arnalǵan tujyrymdamasyn iske asyrý, ulttyq qurama komandany jasaqtaý jáne halyqaralyq jarystarǵa, onyń ishinde 2025 jyly Bahreınde ótetin jastar arasyndaǵy jazǵy Azııa oıyndaryna daıyndyq aıasynda ótkizilýde.
