Bir aıdan astam ýaqytqa sozylatyn aýqymdy festıval Abaı oblysynyń turǵyndaryn kóktemgi merekelerdiń shattyq kóńil-kúıimen biriktiredi.
14 naýryzdan bastap Abaı oblysynda Naýryz meıramyna arnalǵan iri mádenı joba – «ELDEN SÁLEM!» festıvali bastaý aldy. Festıval dástúrdi, ónerdi, halyq shyǵarmashylyǵyn jáne iskerlik bastamalardy toǵystyryp, birlik pen ulttyq jańǵyrýdyń erekshe atmosferasyn qalyptastyrady.
Jobanyń sátti bastamasy – Naýryz meıramynyń bastaýy sanalatyn Kórisý kúni merekesimen tuspa-tus keldi. Aldaǵy birneshe apta boıy mádenı baǵdarlama oblystyń barlyq aýdandary men qalalaryn qamtyp, shyǵarmashylyq, tájirıbe almasý jáne dostyq qarym-qatynas alańyna aınalady.
«Oblysymyzda mundaı shara alǵash ret ótýde. Basty maqsat – aýdandar arasyndaǵy yntymaqtastyqty nyǵaıtý jáne tájirıbe almasý», – deıdi Abaı oblysynyń mádenıet, tilderdi damytý jáne arhıv isi basqarmasy basshysynyń orynbasary Tolqyn Berikbekova.
Búgin festıval aıasynda Jarma aýdanynda Besqaraǵaı aýdanynyń mádenıet kúni bastaý aldy. Besqaraǵaılyq ónerpazdardy dástúrge saı Kórisý rásimimen qarsy aldy.
Al Kókpekti aýdanynan kelgen joba qatysýshylary ózderiniń óneri men jetistikterin kórsetý úshin Borodýlıha aýdanyna attandy.
Shyǵarmashylyq ujymdardyń merekelik baǵdarlamasy, aýylsharýashylyq jármeńkeleri, bıznes jáne memlekettik qurylym ókilderi arasyndaǵy iskerlik kezdesýler – munyń bárin bir jobada avtorlar sátti úılestirip, kúrdeli ári qyzyqty mindetti sátti oryndady.
Festıvaldiń qorytyndysy boıynsha Abaı Qunanbaıulynyń 180 jyldyǵyna arnalǵan aýqymdy gala-konert ótedi.«ELDEN SÁLEM!» festıvali Abaı oblysy turǵyndary men barsha qazaqstandyqtar úshin bıylǵy jyldyń eń este qalarlyq oqıǵalarynyń biri bolatyny sózsiz.
