Belarýs prezıdenti Aleksandr Lýkashenko amerıkalyq bloger Marıo Naýfalǵa bergen suhbatynda Ýkraına prezıdenti Vladımır Zelenskııge óz ulymdaı qaraǵanyn málimdedi, dep habarlaıdy "Adyrna" ulttyq portaly Beltaǵa siltep.
Suhbat barysynda Marıo Naýfal Zelenskııdiń qıyn jaǵdaıda qalǵanyn atap ótti. Onyń aıtýynsha, qazirgi oqıǵalar aıasynda Zelenskıı erjúrek adam retinde kóringenimen, ol ózgelerdiń oıynyndaǵy peshkaǵa aınalyp, soǵysqa ákelgen qatelikter jiberdi.
"Men de Zelenskııge janym ashıdy. Oǵan óz ulymdaı qaradym. Biz jaqsy qarym-qatynasta boldyq, Ýkraınada kezdesip, kelissózder júrgizdik. Ol maǵan aqyldy adam bolyp kórindi, biraq alǵashqy qadamdarynda kóp nárseni bilmedi. Menen keńes surap júrdi. Bizde jyly, dostyq qarym-qatynas boldy. Biraq ol ýltraultshyl kúshterdiń jeteginde ketti, bul – úlken qatelik", – dedi Lýkashenko.
Belarýs basshysy Zelenskııdiń ýkraınalyqtarǵa bergen eń úlken ýádesi – soǵysty toqtatý ekenin eske saldy.
"Biraq ol kerisinshe, soǵysty odan ári ýshyqtyrdy. Bul janjaldyń órshýine ózi sebepker boldy. Saıasatta janashyrlyq bolmaıdy. Sen óz eliń úshin, halqyń úshin jaýaptysyń. Al onyń saıasaty eldiń kúıreýine jáne halyqtyń kedeılenýine ákeldi", – dep túıindedi Lýkashenko.
