Kókshetaýda Alǵys aıtý kúni men Qazaqstan halqy Assambleıasynyń 30 jyldyǵyna arnalǵan «Birlik pen kelisimniń 30 jyly» forýmy ótti.
Is-shara Qazaqstan halqy Assambleıasynyń 30 jyldyǵyna arnalǵan eskertkish taqtanyń ashylýymen bastaldy. Ashylý rásimine Aqmola oblysynyń ákimi Marat Ahmetjanov, Assambleıa ardagerleri jáne aǵa býyn ókilderi qatysty.
Oblys ákimi qatysýshylarǵa Qazaqstan Respýblıkasynyń Prezıdenti Qasym-Jomart Toqaevtyń quttyqtaý hatyn oqyp berdi.
Jınalǵan qaýym aldynda sóz sóılegen Marat Ahmetjanov Qazaqstannyń beıbitshilik pen kelisimniń jarqyn úlgisi ekenin atap ótti. Sondaı-aq, Qazaqstan halqy Assambleıasy – el birligin, dostyq pen turaqtylyqty nyǵaıtýǵa yqpal etetin biregeı ınstıtýt ekenin aıtyp, Assambleıa múshelerine jáne kópultty qoǵamnyń damýyna ólsheýsiz úles qosyp júrgen azamattarǵa alǵysyn bildirdi.
«Aqmola oblysyndaǵy etnomádenı birlestikter de ulttar arasyndaǵy dostyq pen yntymaqtastyqty nyǵaıta otyryp, el birligin bekemdeýge zor úles qosty»– dep atap ótti M. Ahmetjanov.
Is-shara barysynda etnomádenı birlestikter men qoǵamdyq uıymdardyń belsendi músheleri marapattaldy. Olardyń qatarynda Aqmola oblystyq Qazaqstan halqy Assambleıasynyń ardagerleri Amangeldi Syzdyqov pen Jamul Mushanov bar.
«Qazaqstan halqy Assambleıasy – ártúrli ult ókilderi tatý-tátti ómir súretin erekshe alań. Birlik pen kelisim – elimizdiń turaqtylyǵy men órkendeýiniń negizi. Biz bul qundylyqtardy saqtap, keler urpaqqa jetkizýimiz kerek»,– dep atap ótti ol.
Forým óńirdiń shyǵarmashylyq ujymdary qatysqan konerttik baǵdarlamamen aıaqtaldy.
Aıta keteıik, Aqmola oblystyq Assambleıasy quramynda 40-tan astam etnomádenı birlestik, 104 analar keńesi, 21 aqsaqaldar keńesi bar. Sonymen qatar, óńirde ǵylymı-saraptamalyq top, medıaııa kabıneti, jýrnalıster klýby, sándik-qoldanbaly óner sheberleriniń odaǵy, «Assambleıa jastary» respýblıkalyq qoǵamdyq birlestiginiń óńirlik ókildigi, memlekettik tildi nasıhattaý jáne damytý ortalyǵy, kásipkerler qaýymdastyǵy júıeli túrde jumys isteıdi.
