AQSh prezıdenti Donald Tramp Florıdadaǵy rezıdenııasynda ótken baspasóz máslıhatynda Ýkraınada saılaý ótkizý qajettigin aıtty, dep habarlaıdy "Adyrna" ulttyq portaly.
Onyń aıtýynsha, eger Kıev Reseımen qaqtyǵysty retteý boıynsha kelissózderge qatysqysy kelse, bul mańyzdy qadam bolmaq.
Aq úı basshysy qazirgi Ýkraına prezıdenti Vladımır Zelenskııdiń reıtıngi 4%-ǵa deıin tómendegenin atap ótti. Respýblıkashyl saıasatkerdiń aıtýynsha, Ýkraınada kópten beri saılaý ótpegen.
"Qazir Ýkraınada uzaq ýaqyttan beri saılaý ótken joq. Onda áskerı jaǵdaı engizilgen. Muny moıyndaý men úshin qanshalyqty aýyr bolsa da, ýkraın kóshbasshysynyń qoldaýy 4%-dy quraıdy", – dedi AQSh prezıdenti.
Tramptyń túsindirýinshe, Ýkraınada saılaý ótkizý máselesi Reseıdiń talaby emes. Biraq kóptegen elderdi alańdatyp otyr.
Aıta keteıik, Reseı prezıdenti Vladımır Pýtın Ýkraına prezıdenti Vladımır Zelenskıımen kelissózder júrgizýge daıyn. Bul týraly 18 aqpanda RF prezıdentiniń baspasóz hatshysy Dmıtrıı Peskov málimdedi.
“Jasalǵan kelisimderdi zańdy túrde bekitý Zelenskııdiń legıtımdiligin daýlaýǵa bolatynyn eskere otyryp, tereń talqylaýdy qajet etedi”, – dep atap ótken Kreml ókili. Mundaıda Pýtınniń Kremlde otyrǵanyna 25 jyl bolǵanyn aıta ketken abzal.
