Búgin Jetisý oblysynda halyqtyń áleýmettik osal toptary sanatynan jáne kóp balaly otbasylardan 23 shańyraq jańa qonys qýanyshyna keneldi. Kezekte turǵandarǵa oblys ortalyǵynyń jańa turǵyn úı alabynda úsh bólmeli úılerdiń kilti tabystaldy.
Jańa qonys ıeleriniń arasynda kóp balaly jáne tolyq emes otbasylar, múgedek balalardy tárbıelep otyrǵan otbasylar, I jáne II toptaǵy múgedekter, zeınetkerler bar.
Taldyqorǵan qalasy ákimdiginiń málimetinshe, «Jastar-3» shaǵyn aýdanynda turǵyn úılerdiń qurylysy ótken jyldyń shilde aıynan bastap júrgizilgen bolatyn. Sóıtip kezekte turǵandar úshin jalǵa beriletin 56 jańa úı salynyp, satyp alyndy. Búgin kiltteri tabystalǵan 23 úıden basqa 33 úı aqpan aıynyń sońyna deıin qoldanysqa beriledi. Ár úıdiń jalpy aýdany 76 sharshy metr. Munda úsh turǵyn bólme, as úı men jýynatyn bólme bar. Aıta keterligi, bıylǵy jyldyń sońyna deıin osy turǵyn aýdanda jeke qurylys salýshylar esebinen taǵy 150-ge jýyq úı paıdalanýǵa beriledi degen jospar bar.
Jańa úıge ıe bolǵandardyń biri kóp balaly ana Indıra Imanbolova:
- Turǵyn úıge kezeginde 10 jyldan astam ýaqyt turdyq. Baspana jaldaýdyń quny da biz úshin arzanǵa túspeıdi, oǵan qosa jıi kóshýdiń óz mashaqaty bar. Ásirese balalarym qınalyp ketetin. Endi, mine, óz baspanamyzǵa qol jetkizdik, qýanyshymyzda shek joq, - deıdi alty balanyń anasy I. Imanbolova.
Turǵyn úı kezeginde turǵan Merýert Ábdiqadyrova da jańa baspanaǵa qol jetkizdi. Qonystoı ıesiniń anasy qýanyshyn jasyrmaı:
- Qyzym on eki jarym jyl degende úı alyp otyr. Alty balasy bar. Buǵan deıin jaldamaly páterde turyp júrgen. Qazir Merýerttiń úıli bolǵanyna jaqyn jandary, bárimiz qýanyp jatyrmyz, - deıdi Kúpan Ábdiqadyrova.
Eske salsaq, buǵan deıin, ıaǵnı osy jyldyń basynda Taldyqorǵandaǵy 49 kóp balaly otbasyna «Bereke» kottedj qalashyǵyndaǵy turǵyn úılerdiń kilti tabystalǵan bolatyn.
Jalpy ótken jyly Taldyqorǵanda 1283 otbasy turǵyn úımen qamtylyp, kezek 8,3%-ǵa tómendese, osy jyly taǵy 1483 otbasy turǵyn úıge qol jetkizedi. 1041 páterlik 28 úıdiń, 107 kottedjdiń qurylysy aıaqtalady jáne halyqtyń áleýmettik osal toptary úshin 300 páter satyp alynady. Sóıtip, 2023-2025 jyldary oblys ortalyǵynda 5 myńǵa jýyq kezekte turǵandar turǵyn úımen qamtamasyz etiledi.
