Qazaqstanda 2025 jyl bastala salysymen kartoptyń baǵasy kúrt ósti. 21 qańtarda respýblıka boıynsha kartop orta eseppen 320 teńgeden satyldy. Astananyń azyq-túlik dúkenderinde ár adam tek 5 kg kartop ala alatyndaı jaǵdaı qalyptasty. Úkimettiń baspasóz qyzmeti baǵanyń kúrt ósýine kartopty kórshi elderge jetkizý mólsheriniń artýy sebep bolǵanyn jáne kartop eksporty alty aıǵa toqtatylǵanyn habarlady.
Aýyl sharýashylyǵy salasy boıynsha sarapshy - Kırıll Pavlov Taspanews.kz tilshisine sharýa qojalyqtarynyń satý baǵasy, taýar qunyn memlekettik retteý jáne jaqyn arada taǵy qandaı azyq-túlik túri qymbattaýy múmkin ekendigi týraly aıtty.
Pavlov kartop baǵasyn memleket retteı ala ma degen suraqqa eń aldymen memlekettiń ózi jaýap berýi kerek degen oıda.
«Naryq jáne oǵan áser etetin tetikter bar. Sonymen qatar, memlekettik retteý kezinde de májbúrleý sharalary qoldanylýy múmkin, alaıda bul jaǵymdy áser ete me, jaǵymsyz áser ete me belgisiz», - dep sanaıdy sarapshy.
Kırıll Pavlov eldegi kartop baǵasynyń ósýine ónimdi halyqqa tikeleı satýshylar úles qosqanyna senimdi, ıaǵnı fermerlerden ótken ónim bizge asyra siltengen ústeme baǵamen keledi.
«Fermerler kartopty tıimdi baǵamen satady. Ótken jyly olar kartopty tipti óz qunynan tómen baǵada satqan, osy jyly da ústinen túsetin paıdasy kóp bolmady. Olardyń baǵasyn joǵary dep aıtýǵa kelmeıdi: kartop úshin soma orta eseppen 120-150 teńgeden bastalyp, keıbir tańdaýly sorttar úshin 180 teńgemen shekteledi»,—deıdi sarapshy.
Mamannyń aıtýynsha, kartop qoımalardan osy baǵamen shyǵady.
«Teorııalyq turǵydan qarasaq, meniń oıymsha, kóktemde pııaz baǵasy kóterilip ketýi múmkin, sebebi Ortalyq Azııadaǵy múmkin bolatyn jaǵdaılar bizge de áser etýi yqtımal. Tynyq muhıtyndaǵy tómen temperatýranyń áseri Aýǵanstanda, Pákistanda jáne Iranda qurǵaqshylyq pen joǵary temperatýrany týǵyzady», – dep bólisti sarapshy.
Nátıjesinde, atalǵan memleketter egin tapshylyǵyna tap bolýy múmkin jáne bul bizdegi pııazdyń baǵasyna áser eteri sózsiz. Osylaısha, qazaqstandyqtar pııaz sharýashylyǵymen jappaı aınalysa bastaıdy. Mundaı jaǵdaı - qalypty úrdis.
«Bizdiń fermerler pııazdyń qymbattaǵanyn bile sala, ony jappaı ósire bastaýy múmkin. Máselen, Jambyl oblysynda keminde júz gektar jeri barlardyń bári pııaz egýge kirisip ketse, kelesi jyly pııaz baǵasy tómendep ketýi múmkin, sebebi kókónistiń elde kóp bolýy baǵanyń quldyraýyna ákelip soǵady. Bul fermerlerge qolaısyz», – deıdi Pavlov.
