Qazaqstan Respýblıkasynyń Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti qasqyr men shıbórilerdi atý týraly mańyzdy aqparatpen bólisti, dep habarlaıdy "Adyrna" ulttyq portaly.
2025 jylǵa arnalǵan qasqyr men shıbórilerdiń sanyn retteýdiń bıologııalyq negizdemesi daıyndalǵan.
«2025 jyldyń 15 qańtar saǵat 10:00-den bastap retteý qajet túrlerdiń (qasqyr, shıbóri) aýlaýǵa ruqsat alý múmkindigi ashylady. Bıologııalyq negizdemege sáıkes, janýarlar sanyn retteý merzimi 2025 jyldyń 31 jeltoqsanyna deıin bekitildi», – dep málimdedi Orman sharýashylyǵy jáne janýarlar dúnıesi komıteti.
Aqmola, Batys Qazaqstan, Qaraǵandy, Qostanaı, Mańǵystaý, Pavlodar jáne Ulytaý oblystarynda ruqsat tek úı janýarlaryna shabýyl tirkelgen jaǵdaıda ǵana beriledi.
Janýarlar sanyn retteý boıynsha ruqsat alý rásimi Qazaqstan Respýblıkasynyń Ekologııa, geologııa jáne tabıǵı resýrstar mınıstriniń 2020 jylǵy 30 jeltoqsandaǵy №347 «Janýarlar túrlerin alý boıynsha ruqsat berý erejelerin bekitý týraly» buıryǵymen retteledi.
Komıtettiń aıtýynsha bul qyzmet tolyǵymen avtomattandyrylǵan. «Elektrondyq úkimet» veb-portalynda www.elicense.kz arqyly qyzmetti paıdalanýǵa bolady.
