Memlekettik keńesshi Erlan Qarın ǵalym Mekemtas Myrzahmetulynyń qazasyna qatysty kóńil aıtty, dep habarlaıdy "Adyrna" ulttyq portaly.
"Keshe ádebıet álemindegi alyp báıterektiń qulaǵanyn estip, kóńil aıtyp edik, búgin de qazaqtyń aıaýly azamatynan, ardaqty aqsaqalynan aıyrylyp qalyppyz.
Alashtyń aqylgóı abyzy, Abaıtanýshy ǵalym, fılologııa ǵylymdarynyń doktory, QR Memlekettik syılyǵynyń jáne «Túrki álemine qyzmet» halyqaralyq syılyǵynyń ıegeri Mekemtas Myrzahmetuly dúnıeden ozdy. Qara jamylǵan halyqqa, marqumnyń áýleti men týǵan-týysyna qaıǵyryp kóńil aıtamyn. Sanaly ǵumyryn qazaq ádebıettaný ǵylymy men ult rýhanııatynyń damýyna arnaǵan ǵulama ǵalymnyń mol murasy el ıgiligine qyzmet ete beretinine kámil senemin. Aǵamyzdyń ımany joldas bolsyn. Peıishte nury shalqyp, urpaǵyna ómir bersin", - dep jazdy Erlan Qarın.
