Reseı prezıdenti Vladımır Pýtınnen qazaqstandyqtardyń ushaq apatynda qaza bolýyna baılanysty keshirim surap, ótemaqy tóleý talap etildi, dep habarlaıdy "Adyrna" ulttyq portaly QazTAG-qa silteme jasap.
«Qurmetti Vladımır Pýtın myrza! Ázerbaıjan prezıdenti Ilham Álıevtiń málimdemesin qoldaı otyryp, reseılik tarap barlyq zardap shekkenderge, onyń ishinde Qazaqstan azamattaryna da ótemaqy tóleýi tıis dep sanaımyz», – dep Qazaqstan qoǵamynyń atynan azamattyq belsendi Murat Telibekov Pýtınge úndeý jasady.
Úndeýde Reseı muny tergeý nátıjesin kútpeı-aq júzege asyrýy, sondaı-aq Ázerbaıjan, Qazaqstan, Qyrǵyzstan turǵyndary men óz azamattarynan keshirim suraýy qajet dep aıtylǵan.
«Qalyptasqan qaýipterge qaramastan, bul eldiń bedeline zııan keltirmeıdi. Kerisinshe, óz kinásin erlikpen moıyndaý – ony óteıtin qadam bolmaq. Al ushaqtyń qozǵaltqyshyna qustardyń túsýi nemese salonyndaǵy ottegi ballonynyń jarylýy týraly qısynsyz boljamdar taratý reseılik bıliktiń abyroıyna nuqsan keltiredi», – delingen úndeýde.
Eske sala ketsek, 25 jeltoqsan kúni Aqtaý áýejaıy mańynda Azerbaijan Airlines áýe kompanııasynyń Baký – Groznyı baǵytyndaǵy jolaýshylar ushaǵy apatqa ushyrap, 38 adam qaza tapty. Bortta 5 ekıpaj múshesin qosa alǵanda 67 adam bolǵan. Jolaýshylardyń 6-aýy Qazaqstan, 42-si Ázerbaıjan, 3-eýi Qyrǵyzstan, 16-sy Reseı azamaty. 29 adam jaraqat alyp, aýrýhanaǵa jatqyzyldy, olardyń arasynda eki bala bar. Apattan aman qalǵandar arasynda qazaqstandyqtar joq.
