Abhazııada órt saldarynan bes bala qaıtys boldy. Qaıǵyly jaǵdaıǵa baılanysty 6 qańtar respýblıkada aza tutý kúni bolyp jarııalandy, dep habarlaıdy "Adyrna" ulttyq portaly.
Abhazııanyń Gal aýdanyna qarasty Papynyrhýa (Saberıo) aýylynda bir úıdiń bes qyzy órtten kóz jumdy.
"Áje úıde balalarmen jalǵyz bolǵan. Tańerteń peshti jaǵýǵa árekettenip, benzın men dızel otynyn shatastyryp alǵan. Sonyń saldarynan órt tutanyp, aǵash úı lezde jalynǵa oranǵan. Sol ýaqytta jasy bir jarym men segiz aralyǵyndaǵy bes bala uıyqtap jatqan. Olardy qutqaryp úlgerý múmkin bolmady," – dep túsinikteme berdi Abhazııanyń tótenshe jaǵdaılar mınıstrliginiń Gal bólimshesi.
Abhazııanyń prezıdent mindetin atqarýshy Badra Gýnba qaıtys bolǵan qyzdardyń otbasyna qajetti kómek kórsetýdi jáne oqıǵanyń barlyq mán-jaıyn anyqtaý úshin muqııat tergeý júrgizýdi tapsyrdy.
Keıinnen Gýnba arnaıy jarlyq shyǵaryp, 6 qańtardy respýblıkada aza tutý kúni dep jarııalady. Barlyq memlekettik mekemelerde memlekettik týlar tómen túsiriledi, mádenı mekemelerde, teledıdar men radıoda oıyn-saýyq baǵdarlamalary men habarlar toqtatylady.
