Amerıka Qurama Shtattarynda eldiń 39-shy prezıdenti Djımmı Kartermen memlekettik qoshtasý rásimine arnalǵan aza tutý sharalary bastaldy, dep habarlaıdy "Adyrna" ulttyq portaly BBC-ge silteme jasap.
Karter ótken aıda 100 jasynda óziniń týǵan jeri Djordjııa shtatyndaǵy Pleıns qalasynda dúnıeden ozdy.
Senbi kúni Karterdiń denesi otbasylyq qysqa rásimnen keıin Djordjııa shtatynyń astanasy Atlantaǵa jetkizildi. Onda Djordjııa turǵyndary úshin eks-prezıdentpen qoshtasý rásimi ótti.
Djımmı Kartermen qoshtasqysy keletin barlyq adamdar 7 qańtar, seısenbi tańyna deıin bul múmkindikti paıdalana alady. Sol kúni qaraly sherý Karterdiń denesi ushaqpen jetkiziletin AQSh astanasy Vashıngtonǵa baǵyt alady. Tabyt Kapıtolıı ǵımaratynda qoıylady.
Vashıngtonda amerıkalyqtar 39-shy prezıdentpen qoshtasýdy 8 qańtar, sársenbi tańynan bastap 9 qańtar, beısenbi tańyna deıin jalǵastyra alady.
Prezıdent Djo Baıden 9 qańtardy demalys kúni dep jarııalady.
Barlyq rásimder aıaqtalǵan soń, Karterdiń denesi týǵan jerine qaıtarylyp, byltyr 96 jasynda qaıtys bolǵan jubaıy Rozalın Karterdiń janyna jerlenedi.
Memlekettik jerleý rásimi – bul ulttyq deńgeıdegi shara, erekshe azamattarǵa, eldiń qoǵamdyq ómirine aıryqsha úles qosqan tulǵalarǵa arnalǵan qurmet.
AQSh-ta bul rásimderge prezıdentter kóbinese, eger olardyń otbasy kelisim berse, laıyq dep tanylady. Jerleý rásimi bir aptadan 10 kúnge deıin jalǵasady. Óıtkeni marqummen aldymen týǵan jerinde, sodan keıin el astanasynda qoshtasady.
Sońǵy memlekettik jerleý 2018 jyly qaıtys bolǵan Djordj Býshqa arnalǵan.
Karterdiń janazasy 9 qańtarda Vashıngton Ulttyq soborynda ótedi. Bul rásimge birneshe eks-prezıdentter qatysady dep kútilýde.
Prezıdent Djo Baıden Karterdiń jerleýinde sóz sóıleýge ýáde bergen.
Burynǵy prezıdentter men olardyń jubaılary ádette óz aldyndaǵy prezıdentterdiń jerleýine qatysady. Sondyqtan birinshi hanym Djıll Baıden jáne eks-prezıdent Barak Obama, Hılları jáne Bıll Klıntondar qatysady dep kútilýde.
Saılanǵan prezıdent Donald Tramp ta rásimge qatysatynyn rastady. Byltyr ol Rozalın Karterdiń jerleýine qatyspasa da, onyń jubaıy Melanııa jáne basqa eks-birinshi hanymdar sol rásimde bolǵan edi.
Tramp Vashıngtonda ótken respýblıkashyl Djordj Býshtyń jerleý rásiminde de boldy. Ol jerde bes prezıdent, onyń ishinde Djımmı Karter de bolǵan.
