Túrkııa Ýkraınada tez arada atysty toqtatýdy jaqtaıdy. Bul týraly beısenbi, 2 qańtarda Túrkııa syrtqy ister mınıstri Hakan Fıdan belgııalyq áriptesi Bernard Kventınmen birlesken baspasóz máslıhatynda málimdedi, dep habarlaıdy “Adyrna” ulttyq portaly.
«HHI ǵasyrda Eýropanyń ortalyǵynda júzdegen myń adamnyń ómirin qıǵan, tutas bir eldi joıǵan soǵys jáne osy soǵystan týyndaǵan kóshi-qon, ekonomıkalyq jáne basqa da daǵdarystar múmkindiginshe tezirek aıaqtalýy kerek», - dep keltiredi Fıdan Hurriyet gazetiniń saıtynda.
Túrkııanyń syrtqy ister mınıstriniń aıtýynsha, Kventınmen kezdesý barysynda olar Eýropada jáne búkil álemde soǵystyń aıaqtalýy týraly óz pikirlerin bildirip, osy másele boıynsha oılarymen bólisken.
Qarasha aıynda Fıdan Reseı-Ýkraına soǵysyn ádil sheshý úshin Ýkraınanyń aýmaqtyq tutastyǵyn saqtaýdy talap etken bolatyn jáne Ankara Máskeý men Kıevtiń ustanymdary arasynda ortaq sheshim tabýǵa tyrysatynyn málimdegen.
Baspasóz máslıhatynda Hakan Fıdan Sırııa máselesin de qozǵady.
«50 jylǵa sozylǵan Asad rejıminiń, ıaǵnı zulymdyq rejıminiń aıaqtalýy - Sırııa halqy men bizdiń aımaq úshin úlken baqyt», - dedi túrik mınıstri.
Ol halyqaralyq qaýymdastyqty Sırııa halqyna kómektesýge shaqyryp, sırııalyqtardyń «óz bolashaǵyn múmkindiginshe tezirek quratynyna» senim bildirdi.
