30 jeltoqsan kúni Astanaǵa Qytaı Halyq Respýblıkasynyń Qazaqstan Respýblıkasyndaǵy jańa Tótenshe jáne Ókiletti Elshisi Han Chýnlın keldi. Bul týraly Qytaıdyń Qazaqstandaǵy elshiligi málimdedi, dep habarlaıdy “Adyrna” ulttyq portaly.
Aqparat boıynsha, Han Chýnlındi áýejaıda Qazaqstannyń Syrtqy ister mınıstrliginiń qyzmetkerleri men Qytaıdyń Qazaqstandaǵy dıplomatııalyq mıssııasynyń qyzmetkerleri qarsy aldy.
Elshi óz kezeginde qazaqstandyqtarǵa rızashylyǵyn bildirdi. Ol sonymen qatar eki el arasyndaǵy dıplomatııalyq qarym-qatynastardyń ornaǵanyna 33 jyl tolýyna oraı ony Qytaı basshysy Sı zınpın QHR-dyń QR daǵy 12-shi Tótenshe jáne Ókiletti Elshisi qyzmetine taǵaıyndaǵanyn qurmet tutatynyn atap ótti.
«Osydan 33 jyl buryn eki el basshylarynyń strategııalyq basshylyǵymen dıplomatııalyq qarym-qatynas ornatqannan beri Qytaı men Qazaqstan qarym-qatynasy úzdiksiz serpindi damýǵa qol jetkizdi. Sondaı-aq turaqty jan-jaqty strategııalyq áriptestik tarıhyndaǵy eń joǵary deńgeıge kóterildi», - dedi Han Chýnlın.
Sonymen birge Elshi Qytaıdyń qazir Shanhaı yntymaqtastyq uıymynyń kezekti tóraǵasy ekenin, al Qazaqstan kelesi jyly ekinshi «Qytaı-Ortalyq Azııa» sammıtin ótkizetinin tilge tıek etti. Chýnlın osyndaı mańyzdy sátte jaýapty qyzmetke taǵaıyndalý oǵan úlken jaýapkershilik júkteıtinin aıtty.
Ol eki memleket basshylary júktegen mindetterdi adal atqaratynyn, Qytaı men Qazaqstan qarym-qatynasynyń «jańa altyn otyz jyldyǵyn» qurýǵa belsendi túrde umtylatynyn basa aıtty.
Aıta keteıik, Han Chýnlın 1970 jyly dúnıege kelgen. Ol buǵan deıin Qytaı Halyq Respýblıkasynyń Rýmynııadaǵy Elshisi (2022 jyldyń mamyrynan 2024 jyldyń jeltoqsanyna deıin) qyzmetin atqarǵan.
Eske sala keteıik, 2024 jyldyń 2 jeltoqsanynda Memleket basshysy Qytaıdyń Qazaqstandaǵy ókiletti elshisi Chjan Sıaony qabyldady. Kezdesý barysynda Prezıdent Chjan Sıaonyń qazaq-qytaı dostyǵyn tabysty damytýǵa, memleketaralyq baılanystardy tereńdetýge qosqan úlesin joǵary baǵalap, II dárejeli «Dostyq» ordenimen marapattady.
