Mádenıet jáne aqparat mınıstrligi jýrnalısterdiń beıbit jıyndarda jumys isteý tártibiniń jobasyn jarııalady, dep habarlaıdy “Adyrna” ulttyq portaly.
“Beıbit jınalystarda buqaralyq aqparat quraly úshin habarlamalar men materıaldar jınaý, olardy óńdeý jáne daıyndaý kezinde jýrnalıstiń ózimen birge jýrnalıst kýáligi bolady”, - dep jazylǵan qujatta.
Sondaı-aq beıbit jıynnan habar taratatyn jýrnalısterdiń arnaıy aıyrym belgilerin taǵyp júrýi keregi aıtylǵan.
Ol belgiler:
— Aldyńǵy jáne artqy jaǵynda «PRESS» degen jazýy bar ashyq kók tústi keýdeshe;
— Qanyq sary tústi, ortasynda «PRESS» degen jazýy bar jeńdegi tańǵysh;
— Ortasynda «PRESS» degen jazýy bar kók tústi japsyrma.
Foto: Qazaqstan Respýblıkasynyń Mádenıet jáne aqparat mınıstrligi
Odan bólek, beıbit jıyn ótip jatqan eldi mekenniń ákimdigi jýrnalıst jiberetin suraý negizinde jýrnalısterdi Jedel baspasóz ortalyǵyn uıymdastyrady. Buqaralyq aqparat quraly beıbit jınalys ótkiziletin kúnnen bir kún buryn jýrnalısterdiń sanyn kórsete otyryp, erkin nysanda suraý jiberedi.
Jedel baspasóz ortalyǵy lentamen qorshalyp, elektrmen jabdyqtalyp, foto, beınetúsirilim jasaýǵa, suhbat alýǵa jetkilikti jerden belgilenýi kerek.
Degenmen, jýrnalıster arnaıy lentamen qorshalǵan Jedel baspasóz ortalyǵynyń syrtynda da jumys isteı alatyny aıtylǵan.
Jergilikti ákimdikter jýrnalısterdi Jedel baspasóz ortalyǵyna alyp barýǵa, uıymdastyrýshylarmen jáne qatysýshylarmen suhbat uıymdastyrýǵa, qaýipsizdik sharalaryn túsindirýge mindetteledi.
