29 jeltoqsan kúni Bangkoktan Ońtústik Koreıaǵa ushqan Jeju Air áýe kompanııasynyń ushaǵy Mýan áýejaıyna qoný kezinde apatqa ushyrady, dep habarlaıdy "Adyrna" ulttyq portaly Yonhap agenttigine silteme jasap.
Derekterge súıensek, bortta keminde 175 adam bolǵan. Ushaq ushý-qoný jolaǵynan shyǵyp, úlken jyldamdyqpen qorshaýǵa soǵylǵan. Aldyn ala málimet boıynsha, barlyq jolaýshy qaza tapqan. Tek eki adam ǵana aman qalǵan. Reuters agenttiginiń málimetinshe, olardyń ekeýi de ekıpaj músheleri. Alaıda basqa birqatar BAQ-tyń málimetinshe, aman qalǵandardyń biri – jolaýshy.
"Bortynda shamamen 175 jolaýshy men alty ekıpaj múshesi bolǵan ushaq Bangkoktan qaıtyp kele jatqan", – dep habarlaıdy agenttik.
Apatqa ushyraǵan Jeju Air áýe kompanııasynyń Boeing 737 ushaǵynda 173 Ońtústik Koreıa azamaty jáne eki Taıland azamaty bolǵan.
Aman qalǵan 33 jastaǵy stıýardessanyń aýrýhanada jatqany belgili boldy. Onyń ómirine qaýip joq. Biraq, ol qatty kúızeliske ushyraǵan
Qazirgi ýaqytta áýejaıda qutqarý jumystary júrgizilýde. Órtti sóndirýge 80 órt sóndirý toby jumyldyrylǵan. Bılik apattyń sebepterin anyqtaýda. Yonhap agenttiginiń habarlaýynsha, ushaq ushý kezinde qustarmen soqtyǵysqan. Bul shassıdiń isten shyǵýyna sebep bolǵan.
Eldegi saıası daǵdarys saldarynan qyzmetinen shettetilgen Han Dok Sýdan keıin ýaqytsha kóshbasshy bolyp taǵaıyndalǵan Ońtústik Koreıanyń prezıdent mindetin atqarýshy Chhve San Mok tıisti memlekettik mekemelerge apattan keıingi qutqarý jumystaryn barynsha tıimdi júrgizýdi tapsyrdy.
Yonhap agenttiginiń habarlaýynsha, Seýlden 288 shaqyrym qashyqtyqta ornalasqan Mýana áýejaıyndaǵy barlyq ishki jáne halyqaralyq reıster toqtatyldy.
Mýandaǵy apat – Jeju Air kompanııasynyń 20 jyldyq tarıhyndaǵy alǵashqy áýe apaty. Kompanııa Boeing 737-800 ushaǵyn 2017 jyldan beri paıdalanǵan, oǵan deıin ushaq Ryanair kompanııasyna tıesili bolǵan.
Eske sala keteıik, 25 jeltoqsan kúni AZAL áýe kompanııasynyń Embraer 190 ushaǵy Baký–Groznyı baǵytynda ushyp bara jatyp, Aqtaý áýejaıynan 3 shaqyrym jerde apatqa ushyraǵan edi. Ushaq bortynda 67 adam bolǵan. Onyń 62-si jolaýshy jáne beseýi ekıpaj múshesi. Olardyń 38-i qaza taýyp, 29 adam aýrýhanaǵa jetkizildi. Ushaq ekıpajynan 2 adam tiri qaldy.
