Reseı prezıdenti Vladımır Pýtın Ázerbaıjan prezıdenti Ilham Álıevten Aqtaý mańynda bolǵan ushaq apatyna baılanysty keshirim surady, dep habarlaıdy "Adyrna" ulttyq portaly.
Bul týraly Reseı syrtqy ister mınıstrliginiń baspasóz qyzmeti habarlady. Málimetterde "keshirim suraý" jaıly ekinshi kezekte aıtylǵany keltirilgen.
Reseı tarapynyń bastamasymen eki el basshylary telefon arqyly sóılesken. Áńgime barysynda Vladımır Pýtın Reseı áýe keńistiginde oryn alǵan qaıǵyly oqıǵaǵa baılanysty keshirim surap, qaza tapqandardyń otbasylaryna kóńil aıtty jáne zardap shekkenderge tez saýyǵyp ketýin tiledi.
Reseı SIM málimdemesinde Baký-Groznyı baǵytyndaǵy Ázerbaıjan ushaǵy Aqtaý áýejaıy mańynda apatqa ushyraǵanǵa deıin birneshe ret Groznyı áýejaıyna qonýǵa tyrysqany aıtyldy. Sol ýaqytta Groznyı, Mozdok jáne Vladıkavkaz qalalaryna ýkraınalyq drondar shabýyl jasaǵan. Reseı áýe qorǵanys júıeleri bul shabýyldardy toıtarý barysynda jumys istegen.
Reseı Tergeý komıteti oqıǵa boıynsha QR Qylmystyq kodeksiniń 263-babyna sáıkes («Áýe kóliginiń qozǵalysy jáne ony paıdalaný qaýipsizdigi erejelerin buzý») qylmystyq is qozǵady. Azerbaıjan prokýratýrasynyń eki qyzmetkeri Groznyıda reseılik prokýratýra jáne tergeý organdarymen birge jumys isteýde.
Alǵashqy derekterge sáıkes, apattyń sebebi retinde qus ushaq qozǵaltqyshyna kirip ketýi múmkin degen boljam aıtylǵan. Bul derekti Reseı azamattyq avıaııa ókili Artem Korenıako rastaǵan.
Alaıda, 26 jeltoqsanda Euronews telearnasy apatqa reseılik áýe qorǵanys júıesiniń «Panır-S» zymyrany sebep bolǵany týraly habarlady.
28 jeltoqsanda Qazaqstan prezıdenti Qasym-Jomart Toqaev Aqtaý mańyndaǵy ushaq apatyna baılanysty jedel keńes ótkizdi. Prezıdent oqıǵanyń barlyq aspektilerin muqııat tekserýdi tapsyrdy.
Eske sala keteıik, Senat tóraǵasy Máýlen Áshimbaev birneshe kún buryn áýe apatynyń sebepteri men zaqymdaný sıpaty belgisiz ekenin aıtty. Ol óz sózinde keıbir adamdar osy jaǵdaıdy óz múddesine paıdalanýǵa tyrysyp jatqanyn atap ótken bolatyn.
"Bul - alypqashpa áńgimeler, dálelsiz málimdemeler. Mundaı baǵa berýdi qazir taratý durys emes ári etıkaǵa jatpaıdy dep oılaımyn. Bul, eń aldymen, keıbir adamdardyń osy jaǵdaıdan ózine paıda túsirgisi keletinin, haıp jasap, qaralym jınap, basqa da óz múddesin kózdeıtinin kórsetedi, – degen ol.
Ázerbaıjan parlamentiniń depýtaty Rasım Musabekov bul jaǵdaıǵa baılanysty Reseıdiń keshirim suraýy tıis ekenin málimdegen bolatyn.
Aqtaý mańyndaǵy ushaq apatyna baılanysty reseılik Rosavıaııa basshysy Dmıtrıı Iadrov birer kún buryn barlyq mán-jaıyn muqııat tekserý qajettigin aıtyp, shabýyldy moıyndaǵan edi.
Eske salaıyq, 2020 jyldyń 8 qańtarynda Tegeran áýejaıynan ushyp shyqqan ýkraınalyq PS752 reısi Iran áskerıleriniń eki zymyranymen atyp túsirildi. Borttaǵy 176 adam túgel qaza tapty. Iran bıligi birneshe kúnnen keıin bul oqıǵany "adam faktory" dep túsindirip, qatelikti moıyndap, keshirim surady.
Irannyń syrtqy ister mınıstri Muhammed Djavad Zarıf apattan qaza tapqandardyń otbasylaryna kóńil aıtty. Bul halyqaralyq qoǵamdastyqtyń syndaryna qaramastan, óz kinásin moıyndaýdyń aıqyn mysaly boldy.
Al 2014 jyldyń 17 shildesinde Malaysia Airlines áýe kompanııasynyń MN17 reısi Ýkraınanyń shyǵysynda apatqa ushyrady. Tergeýler nátıjesinde ushaqty reseılik «Býk» zymyran júıesimen atyp túsirgeni anyqtaldy. Zymyran Reseıdiń qarýly kúshterine tıesili bolǵan jáne apat kúninde Ýkraınaǵa jetkizilgen.
Bortta bolǵan 298 adamnyń barlyǵy, onyń ishinde 80 bala men 15 ekıpaj múshesi, qaıtys boldy. Halyqaralyq tergeý toby (JIT) Reseıdiń jaýapkershiligin atap kórsetti. Biraq Reseı tarapy bul aıyptardy joqqa shyǵaryp, oqıǵaǵa Ýkraınany kinálaǵan bolatyn.
