Búgin Jetisý oblysynyń volonterlary 25 jeltoqsanda Aqtaý qalasyna taıaý mańda qulaǵan «Baký-Groznyı» baǵytyndaǵy jolaýshylar ushaǵy apatynan zardap shekkenderge kómek kórsetý maqsatynda Taldyqorǵandaǵy Qan ortalyǵyna baryp, qan tapsyrdy, - dep habarlaıdy Jetisý oblysy ákiminiń baspasóz qyzmeti.
Oblystaǵy erikti jastar alǵashqylardyń biri bolyp qan tapsyrýǵa nıet bildirgen. Olar qıyn jaǵdaıǵa túsken jandarǵa qan berý arqyly kómek kórsetýge jora-joldastary men tanystaryn da shaqyrýda.
- Aqtaý qalasynda áýe kemesiniń qulaǵany týraly oqys jańalyq bárimizge aýyr tıdi. Apattan qanshama adam kóz jumdy, marqumdardyń jany jannatta bolsyn deımiz. Tiri qalǵandardyń tez saýyǵyp, aman-esen jaqyndaryna orlaýyna kómegimiz tısin dep, búgin qan tapsyrýǵa keldik. Endi mundaı aýyr jaǵdaı qaıtalanbasyn dep tileımiz, - dedi «Assambleıa jastary» eriktiler tobynyń múshesi Zaıda Qurmasheva.
Oblystyq qan ortalyǵynyń málimetine qaraǵanda, búgin saǵat 12.00-ge deıin 49 adam qan tapsyrǵan.
– Ortalyqqa áýe apatynan jaraqat alǵan muqtaj jandar úshin qan kómek tapsyramyz dep erikti jastar kelip jatyr. Ázirge Aqtaýdaǵy qan tapsyrý ortalyǵynda qan jetkilikti. Eger jedel qan kerek dese biz kez kelgen ýaqytta jiberýge daıynbyz, – dedi Oblystyq qan ortalyǵynyń dırektory Marat Dosqalıev.
Jetisý oblysy turǵyndarynyń atynan ushaq apatynda qaıtys bolǵandardyń otbasylary men jaqyndaryna kóńil aıtamyz.
