Búgin qazaqtyń aqyn qyzy, poezııa padıshasy, Qazaqstan Respýblıkasy Memlekettik syılyǵynyń laýreaty, Qazaqstan Respýblıkasynyń halyq jazýshysy Farıza Ońǵarsynovanyń dúnıege kelgen kúni.
Bıyl aqynnyń týǵanyna 85 jyl tolyp otyr. Farıza Ońǵarsynova 1939 jyly 25 jeltoqsanda Atyraý oblysy, Isataı aýdany, Manash aýylynda dúnıege kelgen.
Alǵashqy óleńderi respýblıkalyq baspasóz betterinde 1958-shi jyly basylǵan. Tuńǵysh óleńder jınaǵy «Sandýǵash» 1966-shy jyly jaryq kórgen. «Almas qylysh», «Tartady bozbalany magnıtim», «Saıraǵan Jetisýdyń bulbulymyn», «Tyńdańdar, tiri adamdar», «Qarǵys», «Qasiret pen erlik jyry» poemalary, «Úıim meniń – Otanym», «Mańǵystaý monologtary», «Revolıýııa jáne men» óleń toptamalarynyń avtory.
Farıza Ońǵarsynova Gýrev memlekettik pedagogıkalyq ınstıtýtynyń til-ádebıet fakýltetin bitirip, Balyqshy aýdanynyń Erkinqala, «Oktıabrdiń 40 jyldyǵy» qazaq orta mektepterinde muǵalim bolyp jumys istegen. Keıinnen Gýrev oblystyq «Kommýnıstik eńbek» gazetiniń partııa turmysy bóliminde ádebı qyzmetker mindetin atqarǵan. Sonymen qatar, qazirgi «Jas alash» gazetiniń Aqtóbe, Gýrev, Oral oblystary boıynsha menshikti tilshisi bolyp eńbek etken.
1970–1978-shi jyldary respýblıkalyq «Qazaqstan pıoneri» (qazirgi «Ulan») jýrnalynyń bas redaktory, 1978–2000 jyldary «Pıoner» (qazirgi «Aq jelken») jýrnalynyń bas redaktory qyzmetterin atqarsa, 1996 jyldan bastap 2004-shi jylǵa deıin QR májilisiniń I jáne II shaqyrylymdarynyń depýtaty boldy.
2014-shi jyldyń 23-shi qańtar kúni Astana qalasynda uzaq syrqaty sebep bolyp, dúnıeden ótti.
