Táýelsizdik kúni qarsańynda ártúrli sharalar ótedi. Balalardy patrıottyqta baýlý úshin bul - kerek nárse. Biraq sondaǵy aıtylatyn áńgimelerdiń keıbirin jańartý kerek dep oılaımyn.
1) Álem.
Álem tanyǵan Qazaqstan, Abaıdy álem tanyǵan, Shoqan álemdik jańalyq ashqan degen sekildi, ne aıtsa da álemdi qosyp aıtý. Bul - Nursultan Nazarbaev kezinde qalyptasqan ádet. Áleeeem, álem dep otyrýshy edik qoı. Álemdik din lıderleriniń sezi, EKSPO, álem tanyǵan Astana degendeı. Osyny qoıý kerek. Ne bolsa da qazaqqa qanshalyq paıdaly boldy, so jaǵynan kelý kerek. AQSh halqynyń 70%-yna álemde ne bolyp jatqany qyzyq emes desedi. Óıtkeni olarǵa ózderi qyzyq. Olar jerdiń kindigi. Al bizge ózimizdikinen basqanyń bári qyzyq. Ózimizdiki álemge qyzyq bolsa ǵana ózimizge qyzyq.
2) Mendeleev kestesi.
Bizdiń jerimiz baı, jerimizdiń astynda Mendeleev kestesindegi barlyq element bar degen áńgime. Bar bolsa ne bolypty? Ol Lıvııada da bar, azdap bolsa da keshegi qyrylyp jatqan Sırııada da bar. Venesýelllada da bar. Bar bolǵanynan bizge ne paıda? Ol jerde bizdiń qandaı eńbegimiz bar?
Biz jerdiń ústinde ómir súrip jatqan adamdardyń jetistigi týraly aıtýymyz kerek. Ǵylymı jańalyq ashqandar, kásip ustap otyrǵandar, shynaıy óner jasap otyrǵandar. Osylardy aıtyp maqtanýymyz kerek.
3) 100-den astam ulttar men ulystar.
Qazaqstan kóp ultty el, 100-den astam ult ómir súredi degendi qoıý kerek. Odan da burynǵy ánuranda aıtqandaı, “baýyrǵa basqanbyz barshanyń balasyn” deýimiz kerek. Biz barmyz, sosyn bizdiń qanatymyzdyń astynda ómir súrip jatqan azyn-aýlaq ult bar.
4) Elbasynyń arqasy.
Sóz joq, Nursultan Nazarbaevtyń eńbegi bar, biraq sol qıyn kezde ol kisimen birge jumys istegen qanshama adam bar, sol kezdegi qıyndyqqa shydaǵan halyq bar. Sony da aıtýymyz kerek. Eger jaqsylyqtyń bári Nazarbaevtyń arqasy desek, onda qateliktiń de bári sol kisiniń kesiri bolyp qalady.
5) Ǵasyrlar boıy ata-babamyz ańsaǵan táýelsizdik.
Biz Kenesary sháhıt bolǵannan keıin ǵana birjola bodan boldyq. Sonda aınalasy bir-jarym ǵasyr orysqa táýeldi boldyq degen sóz. 1991 jyly táýelsizdigimizdi qalpyna keltirdik. Osylaı aıtqanymyz abzal.
Balalarǵa qansha qıyndyq kórsek te aman shyqqan, myqty halyqpyz degen ıdeıany sińirýimiz kerek.
“Talaıdy ótkerdik, ótkenge salaýat,
keleshek ǵajaıyp, keleshek ǵalamat,
Taǵdyrdyń tezinen, tozaqtyń ózinen aman-saý qalyppyz, aman-saý qalyppyz”.
“Meniń elim, meniń jerim,
Gúliń bolyp egilemin,
Jyryń bolyp tógilemin, elim,
Týǵan jerim meniń - Qazaqstanym!”
Arman Álmenbet
