Qazaqstannyń Ońtústik Koreıadaǵy burynǵy elshisi, qazir de osy elde júrgen Dýlat Baqyshev áleýmettik jelidegi paraqshasyna áskerı jaǵdaı doǵarylyp, el ishi tynyshtalǵany týraly jazdy.
«Keshe túnde Ońtústik Koreıa prezıdenti áskerı jaǵdaı (tótenshe) jarııalaǵan edi. Jaǵdaı 6 saǵatqa ǵana sozyldy. Parlamentte 190 - daı depýtat daýys berip, bul sheshimge qarsy shyqqan bolatyn. Prezıdentke jaqtas, jetekshi partııadan da 18 depýtat oppozıııamen birge daýys berdi», - dep jazǵan dıplomat.
Dýlat Baqyshevtiń jazǵanyna qaraǵanda, osydan keıin mınıstrler kabıneti tótenshe jaǵdaıdy toqtatýǵa uıǵarǵan. «Sonymen bul sharýa bitti. Bir másele sheshildi. Búgin tańda prezıdent ákimshiligi basshysynan bastap, ol jerdegi keńesshiler men mańyzdy laýazymdy tulǵalar jumystan ketý týraly jappaı aryz berdi»,- deıdi ol.
Ońtústik Koreıada 2012-2018 jyldar aralyǵynda Qazaqstannyń elshisi bolǵan Dýlat Baqyshev alda daǵdarys jalǵasady dep sanaıdy. «Sýǵa tas tastasań tolqyndar paıda bolyp, taraıdy ǵoı. Saıasatta da dál solaı... "Eń qyzyǵy" endi bastaldy. Iaǵnı, daǵdarys jalǵasatyn bolady. Nemen aıaqtalaryn ýaqyt qana kórsetedi...» - deıdi dıplomat.
Budan aldyńǵy bir jazbasynda ol jelige «Sońǵy kezderi RF pen KHDR arasyndaǵy yntymaqtastyqtyń kúsheıýi Ońtústik Koreıadaǵy ishki saıası jaǵdaıdy ýshyqtyryp keldi. Bul - keskilesken ishki saıası shaıqastyń belgisi. Qatty ýshyqqan túri», - dep jazǵan edi. Aıtýynsha, jetekshi partııa basshysy da áskerı jaǵdaı jarııalaýǵa qarsy bolǵan.
«Qazaqstandaǵylar Ońtústik Koreıada júrgen týǵan-týysqan, dos - jarandaryńyz týraly ýaıymdamańyz. El tynysh!» - deıdi Dýlat Baqyshev búgingi jazbasynda.
Keshe Qazaqstannyń Koreıadaǵy elshiligi qazaqstandyqtarǵa úndeý jasaǵan. “Koreıa Respýblıkasy prezıdenti Iýn Sok Eldiń áskerı jaǵdaı engizýine baılanysty Koreıa respýblıkasynda júrgen Qazaqstan azamattaryn sabyr saqtap, jergilikti bıliktiń usynystaryn oryndaýǵa jáne kópshilik is-sharalardan aýlaq bolýǵa shaqyramyz”, - delingen edi elshiliktiń habarlamasynda.
Keshe Ońtústik Koreıa prezıdenti Iýn Sok El halqyna joldaý jasap, elde áskerı tótenshe jaǵdaı jarııalanǵanyn aıtqan. Ol shuǵyl keńes ótkizip, ózine ımpıchment jarııalaý áreketi jasalǵanyn málimdegen. Ol oppozıııany eldiń negizgi qyzmetterin oryndaý úshin qajetti barlyq mańyzdy bıýdjet qarajattaryn qysqartty dep aıyptaǵan. Áskerı jaǵdaı jarııalanǵan soń alty saǵattan soń qaıta toqtatyldy. Áskerı jaǵdaıdy doǵarý parlamenttiń talabymen júzege asty.
Ońtústik Koreıanyń saıası qurylysy – kóppartııaly prezıdenttik respýblıka.
