Qazaqstandyq Ánel Sytdyqova TMD memleketteri arasynda alǵash bolyp Antarktıdany júzip ótti, dep habarlaıdy "Adyrna" ulttyq portaly.
Ánel Sytdyqova 750 metr qashyqtyqty 18 mınýt 58.95 sekýndta eńsergen. Bul ýaqytta sýdyń temperatýrasy -1,4 gradýs bolǵan.
«Antarktıdanyń sýlaryn júzip óttik. Men úshin bul óte salqyn boldy. Sýdyń salqyndyǵy -1,4 gradýs bolsa, jeldiń jyldamdyǵy saǵatyna 35 shaqyrym edi. Aısbergter men pıngvınder arasynda júzýdiń áseri bólek. Antarktıda muzdaı qushaǵyn ashqan az ǵana adamnyń qatarynda bolý men úshin erekshe oqıǵa boldy», - deıdi Ánel Sytdyqova.
Áneldiń aıtýynsha, Antarktıdada ótkizilgen 10 kún ishinde olar júzý úshin qolaıly sátti kútken. Sonymen qatar, kemede taǵy 150 jolaýshy bolǵandyqtan, olar kemeniń tártibin saqtaý kerek bolǵan.
Ánel Sytdyqova — Qazaqstannyń alǵashqy «temir hanymy» trıatlonnan, alǵashqy aıronmen jáne ýltramen. Bes jyl buryn ol alǵashqylardyń biri bolyp La-Mansh buǵazyn (38 kılometr) gıdrokostıýmsyz júzý arqyly Qazaqstan atynan alǵashqy jetistigin kórsetken.
2022 jyly jazda Ánel AQSh-ta Manhetten aralynyń aınalasynda 20 kópirden ótip, 48,5 kılometr qashyqtyqty baǵyndyrdy. Budan keıin ol Los-Andjeleste álemdegi eń uzyn marafondyq qashyqtyqtardyń biri — Katalına buǵazyn (shamamen 34 kılometr) toqtaýsyz júzdi.
Katalına, La-Mansh jáne Manhetten aınalasyndaǵy 20 kópir — ashyq sýdaǵy júzýden álemdik «Úshtik koronaǵa» (Triple Crown of Open Water) kiredi. Osylaısha, Ánelge «Úshtik korona hanshaıymy» ataǵy berilip, ol «Úshtik korona» klýbynyń múshesi atandy. TMD keńistiginde bundaı jetistikke eshkim jetken joq.
Ánel otbasymen birge Anglııadaǵy Londonǵa jaqyn jerde turady.
Eske sala keteıik, 2019 jyldyń tamyzynda Prezıdent Qasym-Jomart Toqaev La-Mansh buǵazyn alǵashqylardyń biri bolyp júzgen qazaq qyzyna tańdanysyn bildirgen bolatyn.
