Ózbekstannyń eks-prezıdenti Islam Karımovtiń qyzy Gúlnara Karımovaǵa taǵy bir aıyp taǵyldy, dep habarlaıdy "Adyrna" ulttyq portaly.
Reuters agenttiginiń málimetinshe, Gúlnara Karımova Shveıarııadaǵy eń kóne bankterdiń biri - Lombard Odier arqyly aqshany jylystatýy múmkin degen kúdikke ilingen.
Shveıarııa prokýrorlary bank pen onyń burynǵy qyzmetkerleriniń birine qarsy aıyp taqty. Prokýrorlardyń aıtýynsha, aqsha Lombard Odier-te ashylǵan toǵyz bank shoty arqyly erejelerdi buza otyryp aýdarylǵany kórsetilgen. Bul qarajat Karımova qatysqan qylmystyq uıymmen baılanysty ekeni aıtyldy.
Burynǵy prezıdenttiń qyzy Gúlnár Kárimova qazir Ózbekstanda túrmede jazasyn ótep jatyr. Ol birneshe elderde urlyq, bopsalaý jáne qylmystyq jeli qurdy dep aıyptalǵan bolatyn.
2015 jyly 18 jeltoqsanda Gúlnara Karımovany Tashkent qalalyq soty – 10 jylǵa, al 2020 jyly 18 naýryzda jańa qylmystyq is sheńberinde taǵy 13 jylǵa bas bostandyǵynan aıyrdy. Oǵan "qastandyqqa oqtaldy, qarjy jylystatty, bopsalaý, jymqyrý jáne tonaý qylmystaryn jasady degen aıyptar taǵylǵan. Ózbekstandy kóp jyl basqaryp, aıaq astynan qaıtys bolǵan avtokrat Islam Karımovtyń qyzy Gúlnara Karımova ákesi tiri kezinde-aq Tashkent oblysyndaǵy áıelder kolonııasyna qamalǵan.
2022 jyly Qazaqstandaǵy "Qańtar qyrǵynynan" keıin Qazaqstannyń burynǵy prezıdenti Nursultan Nazarbaev "qaýipsizdik keńesiniń tóraǵasy" ókiletinen aıyrylyp, týystary joǵary qyzmetterinen bosaǵan. Osydan keıin Qazaqstanda da Nursultan Nazarbaevtyń aınalasyndaǵy adamdardyń shetelge "zańsyz shyǵarǵan aqshasyn qaıtarý" qolǵa alynǵan-dy.
