Beısenbi kúni ótken brıfıngte Pentagonnyń baspasóz hatshysynyń orynbasary Sabrına Sıngh Reseıdiń 21 qarashada Ýkraına aýmaǵyna orta qashyqtyqtaǵy ballıstıkalyq zymyrandy (OQBZ) synaqtan ótkizgenin rastady, dep habarlaıdy “Adyrna” ulttyq portaly.
“Golos Amerıkı” agenttigi jarııalaǵandaı. Sınghtiń aıtýynsha, bul zymyran Reseıdiń qurlyqaralyq ballıstıkalyq RS-26 «Rýbej» modeliniń negizinde jasalǵan.
«Zymyran ushyrylmas buryn qysqa ýaqyt ishinde ıadrolyq qaýip-qaterdi tómendetý arnalary arqyly aldyn ala habarlama aldyq», – dedi AQSh Qorǵanys mınıstrliginiń ókili.
«Bul ólimge ákeletin jańa túrdegi qarý, urys alańynda qoldanyldy, sondyqtan bul, sózsiz, alańdaýshylyq týdyrady», – dep atap ótti Sıngh.
Ol bul orta qashyqtyqtaǵy zymyrannyń kádimgi de, ıadrolyq ta oqtumsyqtardy alyp júrýge qabiletti ekenin aıtty.
Beısenbi kúni Vladımır Pýtın Reseıdiń jańa «Oreshnık» ballıstıkalyq zymyranyn ıadrosyz gıperdybystyq jabdyqtaýda qoldana otyryp, Dnepr qalasyndaǵy qorǵanys-ónerkásiptik keshen nysanyna soqqy jasaǵanyn málimdedi. Al Ýkraına prezıdenti Vladımır Zelenskıı bastapqyda Máskeý ýkraın aýmaǵyna qurlyqaralyq ballıstıkalyq zymyranmen soqqy jasady dep málimdegen bolatyn.
Raketa jyldamdyǵy 10 mahqa deıin jetedi – bul sekýndyna 2,5–3 shaqyrym, dep habarlaıdy «Azattyq radıosynyń» reseılik basshynyń málimdemesine silteme jasaı otyryp. Pýtınniń aıtýynsha, bul zymyrandy AQSh pen Eýropada jasalatyn qazirgi zamanǵy áýe qorǵanys júıeleri ustap tura almaıdy.
Kremldiń málimdeýinshe, bul ushyrylym 19 jáne 21 qarashada Ýkraına Qarýly Kúshteriniń Brıansk jáne Kýrsk oblystaryndaǵy nysandarǵa soqqy jasaǵanyna jaýap retinde bolǵan. Bul soqqylarda ATACMS jáne Storm Shadow (SCALP) sııaqty amerıkalyq jáne eýropalyq óndiristegi zymyrandar qoldanylǵany aıtylady.
Eske sala keteıik, osy aptada AQSh prezıdenti Djo Baıden Ýkraınaǵa Vashıngtonnyń eń uzaq qashyqtyqqa ushatyn zymyrandary – ATACMS qoldanýǵa ruqsat bergen bolatyn. Sarapshylardyń pikirinshe, bul amerıkalyq zymyrandardy qoldaný Ýkraınaǵa Kýrsk oblysyndaǵy shekara mańyndaǵy aýmaqty qorǵaýǵa kómektesýi múmkin.
