Reseı SIM Batysty shıelenisti kúsheıtti dep aıyptady, al Polsha SIM bul jaǵdaıdyń sebebi Máskeýdiń qaýip-qateri ekenin málimdedi, dep habarlaıdy "Adyrna" ulttyq portaly golosameriki.com-ǵa siltep.
Beısenbi kúni Reseı Polshadaǵy AQSh-tyń zymyranǵa qarsy qorǵanys bazasynda áskerı daıyndyq deńgeıi artty dep málimdedi. Reseı bul áreket ıadrolyq qaýiptiń jalpy deńgeıin joǵarylatýy múmkin ekenin eskertti.
Varshava bolsa, Máskeýden keletin turaqty «qorqytý áreketteri» NATO-nyń qorǵanys qabiletin arttyrý qajettiligin dáleldeıtinin aıtty.
Baltyq teńiziniń jaǵalaýyna jaqyn Redzıkovo qalasynda ornalasqan Polshadaǵy baza 13 qarashada ashyldy.
«Bul – Amerıkalyqtardyń jáne Soltústik Atlantıkalyq alıans seriktesteriniń strategııalyq saladaǵy turaqsyzdyqty tereńdetetin kezekti arandatýshylyq áreketi», – dedi Reseı SIM ókili Marııa Zaharova. «Bul strategııalyq turaqtylyqty buzyp, ıadrolyq qaýip deńgeıiniń artýyna ákeledi», - delingen málimdemede.
Polsha SIM ókili Pavel Vronskıı bazada ıadrolyq zymyrandar joq ekenin jáne onyń tek qorǵanys maqsatynda qoldanylatynyn atap ótti.
«Bul baza qorǵanysqa qyzmet etedi, shabýyl jasaýǵa emes», – dep jaýap berdi Vronskıı. «Máskeýdiń qaýip-qateri Polsha men NATO-nyń áýe shabýylyna qarsy qorǵanysyn kúsheıtý qajettiligin kórsetedi jáne bul másele AQSh tarapynan muqııat qarastyrylýy tıis».
Redzıkovodaǵy amerıkalyq baza NATO-nyń Aegis Ashore dep atalatyn keń aýqymdy zymyranǵa qarsy qalqanynyń bóligi bolyp tabylady. NATO málimetinshe, bazadaǵy júıeler qysqa jáne orta qashyqtyqtaǵy ballıstıkalyq zymyrandardy ustap qalýǵa qabiletti.
«Batystyq áskerı nysandardyń sıpaty men deńgeıin eskere otyryp, Polshadaǵy bul baza joıylýy múmkin nysandar tiziminde uzaq ýaqyttan beri tur. Bul mindet zamanaýı qarýdyń keń aýqymyn qoldaný arqyly qajet bolǵan jaǵdaıda júzege asyrylýy múmkin», – dedi Reseı ókili Zaharova.
NATO-nyń zymyranǵa qarsy qalqany Polsha men Rýmynııadaǵy nysandardy, sondaı-aq Ispanııadaǵy AQSh ÁTK esmıneterin jáne Túrkııadaǵy erte eskertý radaryn qamtıdy.
Sol kúni Reseı Ýkraınaǵa qurlyqaralyq ballıstıkalyq raketany (QBR) alǵash ret qoldanǵany habarlandy.
21 qarashaǵa qaraǵan túni Ýkraınaǵa jasalǵan shabýyl ıadrolyq qarýdy qoldanbaı júzege asyrylǵan.
Eýroodaqtyń syrtqy saıasat qyzmeti bul fakt rastalsa, Reseıdiń qurlyqaralyq raketany qoldanýy qaqtyǵystyń shıelenisýine ákeletinin málimdedi.
