Astrahan oblysynan jiberilgen ballıstıkalyq raketa Dneprge shabýyl jasady, dep habarlaıdy "Adyrna" ulttyq portaly dw.com-ǵa siltep.
Ýkraınalyq taraptyń málimeti boıynsha, 21 qarashada Reseı áskeri Dnepr qalasyna ártúrli tıptegi raketalar, onyń ishinde aeroballıstıkalyq "Kınjal" raketasy, jeti H-101 qanatty raketasy jáne qurlyqaralyq ballıstıkalyq raketa (QBR) atqylady. Raketa Astrahan oblysynan ushyrylǵan. Shabýyldyń maqsaty – kásiporyndar men mańyzdy ınfraqurylym nysandary boldy dep habarlanady.
Ýkraına Áýe kúshteriniń málimdeýinshe, zenıttik áýe qorǵanys bólimsheleri H-101 úlgisindegi alty raketany atyp túsirdi. Basqa raketalar eleýli zardap ákelmedi. Jaralanǵandar men qaza tapqandar týraly aqparat áli túspegen.
Ýkraınalyq Telegram arnalarynyń málimetinshe, Dnepr qalasyna RS-26 "Rýbej" ballıstıkalyq raketasy qoldanylǵan bolýy múmkin. Bul raketa 2000 jyldardyń ortasynda ázirlenip, 2011 jyly alǵashqy ushýyn júzege asyrǵan. Onyń ushý qashyqtyǵy 6000 shaqyrymǵa jetedi. Buǵan deıin bul qarý 2017 jyly qarý-jaraq qataryna enýi tıis bolǵanymen, keıinirek "Iskander" kesheni paıdasyna alynyp tastalǵan
Dnepropetrovsk oblystyq áskerı ákimshiliginiń basshysy Sergeı Lysaktyń aıtýynsha, shabýyl saldarynan múgedekterge arnalǵan ońaltý ortalyǵy, qazandyqtar jáne birneshe ondaǵan terezeler zaqymdanǵan. Sonymen qatar, garaj kooperatıvinde órt shyǵyp, eki jeke úı buzylǵan.
Eger QBR qoldanylǵany rastalsa, bul Reseı-Ýkraına soǵysy kezinde mundaı qarýdyń birinshi ret qoldanylýy bolmaq. Bloomberg agenttiginiń málimdeýinshe, bul qadam Reseıdiń ıadrolyq qarý múmkindikterin ashyq kórsetýge baǵyttalǵan belgi bolýy múmkin.
Reseı tarapy QBR qoldanylǵanyn resmı túrde rastamady. Reseı prezıdentiniń ókili Dmıtrıı Peskov jýrnalısterge mundaı aqparatty reseılik áskerı mekemelerden suraýdy usyndy.
Sońǵy kúnderi Kıevtegi AQSh, Ispanııa, Italııa jáne Grekııa elshilikteri áýe shabýyldarynyń qaýpine baılanysty óz jumysyn ýaqytsha toqtatty.
Aıta keteıik, 19 qarashada Ýkraına alǵash ret amerıkalyq ATACMS zymyrandary arqyly Reseı aýmaǵyna soqqy berdi.
