Astana ákimi Jeńis Qasymbek elordadaǵy órtten zardap shekken otbasylarǵa kómek kórsetý máselesi týraly pikir bildirdi, dep habarlaıdy "Adyrna" ulttyq portaly.
17 qarasha kúni tańerteń Astanada eki qabatty jeke turǵyn úıdiń shatyry órtenip, tórt bala qaza tapqan bolatyn. Bul qaıǵyly oqıǵa qoǵam nazaryn aýdartyp, baspanasyz qalǵan otbasylardyń taǵdyryna alańdaýshylyq týǵyzdy.
Órtten zardap shekken alǵashqy otbasy turǵyn úı kezeginde turǵany belgili boldy. Ákimniń aıtýynsha, bul otbasy «kópbalaly otbasy» sanatynda kezekte qala beredi.
«Kelesi jyly olardyń kezegi keledi, sondyqtan turǵyn úı berý boıynsha zań aıasynda kómek kórsetiledi», – dedi qala ákimi Jeńis Qasymbek.
Al ekinshi otbasyǵa qatysty ýaqytsha sheshim qabyldanǵan. Olarǵa qazir ýaqytsha jataqhana berildi. Ákim bolashaqta bul otbasynyń baspana máselesi sheshiletinin atap ótti.
«Bul otbasy páter jaldap turǵan, biz bul máseleni sheshý úshin jumys istep jatyrmyz», – dep qosty ol.
Qaıǵyly oqıǵa kezinde eki otbasy turǵan turǵyn úıdiń shatyry jartylaı opyrylyp órtengen. Tórt bala qaıtys bolǵany habarlanǵannan keıin sot-medıınalyq saraptama taǵaıyndalyp, órttiń sebepteri zerttelýde.
Bul jaǵdaı turǵyndardyń qaýipsizdigin qamtamasyz etýdiń mańyzdylyǵyn taǵy da aldyńǵy qatarǵa shyǵardy. Ákimdik zardap shekkenderge barynsha kómek kórsetýge ýáde berip, aldaǵy ýaqytta qaıǵyly oqıǵalardyń aldyn alý sharalaryn kúsheıtýge nıetti ekenin málimdedi.
Qaıǵyly oqıǵa búkil el halqyn dúr silkindirdi. Zardap shekken otbasylarǵa jan-jaqty kómek kórsetý árbir azamattyń, memlekettiń jáne jergilikti bıliktiń ortaq mindetine aınaldy.
