Kesheden beri Astanadaǵy Jazýshylar odaǵynyń basshysy aqyn, uıymdastyrýshylyq qabileti myqty menedjer Dáýletkereı Kápulyn ornynan alyp tastapty degen syńaıdaǵy áńgime shyǵyp, qalamgerlerdiń kóbisi alańdap, áleýmettik jeli ulardaı shýlap ketti. Eki kún buryn ǵana talantty aqyn Baqytjan Aldııardyń 50 jyldyq mereıtoıynda azǵantaı ýaqyt syrlasqanymyz bolmasa, óz basym Dáýletkereımen qoıan-qoltyq aralasqan emespin. Biraq, onyń elordada turatyn qalamgerlerdiń qamyn oılap, tynym tappaı ter tógip jatqanyn kúnde kórip júrmin. Ulttyq kitaphanada tanymal aqyn -jazýshylardyń jaryq kórgen kitaptarynyń tanystyrylymy, dúnıeden ótken qalamgerlerdiń mereıtoılary ótip, neshe túrli konferenııalar uıymdastyrylyp turady. Mine osy is-sharalardyń bárinde de Dáýletkereı júgirip, kóp jaǵdaıda qarjyny da ózi taýyp, qolynan kelgenshe syı-sııapatyn jasap jatady. Meniń oıymsha ony ornynan alyp tastaý ádiletke qııanat bolady.
Qudaıǵa shúkir, qazaqta myqty aqyndar kóp. Biraq myqty menedjerler óte az. Myqty menedjer bolý, ekiniń biriniń qolynan kelmeıdi. Bul bir.
Ekinshiden Dáýletkereıdi ornynan alyp tastasa, bul oqıǵa aldyńǵy tolqyn aǵalar men keıingi tolqyn inilerdiń arasyna syzat túsiredi. Saıası bıliktiń oǵan jol bermegeni durys. Qalamgerlerdiń narazylyq kóńil-kúıi halyqqa berilip, otqa maı quıǵandaı bolamyz. Men buǵan qarsymyn. Kózqarasymyz ár túrli bolǵanyna qaramastan urpaqtar arasynda syılastyq pen sabaqtastyq bolýy tıis. Danyshpan halqymyz «Altaý ala bolsa – aýyzdaǵy ketedi, tórteý túgel bolsa - tóbedegi keledi» degendi beker aıtpaǵan.
Toqsan aýyz sózdiń tobyqtaı túıinin aıtar bolsam, máseleni ushyqtyryp, saıasılandyra bermeı, demokratııalyq jolmen, aqyldasyp sheshken ǵanıbet. Memlekettik keńesshi Erlan Qarındi jaqsy tanımyn. Talaı sóıleskenmin. Naǵyz zııaly tulǵa. Óz basym ony memleketshil azamat dep esepteımin. Syılaımyn. Qurmetim erekshe. Erlan baýyrymnyń elordalyq qalamgerlermen júzdesýge ýaqyt taýyp, bizdiń de sózimizdi tyńdap, máseleniń durys sheshilýine yqpal etetinine kámil senimdimin.
Amangeldi Myrzabek
