Mańǵystaý oblysyndaǵy Jańaózende "Ózenmunaıgazǵa" qarasty "Burǵylaý jumystary basqarmasy"(BJB) kompanııasynyń jumysshylary ereýilge shyqty, dep habarlaıdy "Adyrna" ulttyq portaly Azattyq radıosyna siltep.
BJB kompanııasynyń jumysshylary jumysty toqtatyp, basshylyqqa bes túrli talap qoıǵan. Olar: ÓMG zeınetkerleri men densaýlyǵynan aıyrylǵan munaıshylardyń balalaryn tikeleı shtatqa alý, Jańaózen qalasynda jumyssyzdyq máselesin sheshý, Ujymdyq shartta 2013 deıin bolǵan derbes eńbekaqy tóleý júıesin qaıtarý, mashınıster men operatorlardyń dárejesin kóterý, 30% qosymsha jalaqy tártibin tóleýdi ujymdyq shartqa engizý.
"Eger biz derbes eńbekaqy tóleý júıesine ótsek, jalaqymyz ósedi. Mysaly bizden tabys salyǵyn jáne ózge de salyq túrlerin aılyǵymyzdan ustaıdy. Sony meniń túsinigim boıynsha, jańa júıege ótsek, bizden ustamaıdy. Bizden ustalǵan salyq bizdiń zeınetaqy júıesine quıylady" degen narazylyqqa shyqqan jumysshylardyń biri Ǵazız Mahambetov Azattyq tilshisine.
Azattyqtyń habarlaýynsha, 13 qarashada "Ózenmunaıgazǵa" qarasty taǵy úsh mekeme BJB-nyń talaptaryn qoldap, jumysqa shyqpaǵan. Jelide taraǵan vıdeonyń birinde ÓMG-ǵa qarasty mekeme jumysshysy delingen bir adam "BJB talaptaryn qoldap, bir saǵatqa jumysty toqtattyq" dep aıtady. Vıdeoda jumysshylardyń ǵımarat ishinde turǵany baıqalady.
"BJB-nyń basynda bar másele olarda da bar. 32, 33, 35-mekemeler jumysqa shyqpapty. Men ózim búgin bir mekemege baryp keldim. Olar júz paıyz shyqpaı turmyz”, - dedi Ǵazız Mahambetov.
Jumysshy Ǵazız Mahambetov bir kún buryn keshke BJB mekemesiniń ereýilshilerine "Ózenmunaıgazdyń" bas dırektory, kadr bóliminiń jetekshisi, bas ekonomıst kelip, qyzmetkerlerdiń talabyn tyńdaǵan. Olar jumysshylarǵa "talaptaryń zańsyz" dep aıtqan.
"Biz bul talapty aıtyp kele jatqanymyzǵa jeti aı boldy, osy ýaqyt aralyǵynda eshteńe ózgermedi. Buǵan deıin bizdiń jigitter tipti Astanaǵa deıin baryp, "QazMunaıgazǵa" jazbasha aryzymyzdy tapsyryp kelgen. QMG-nyń jańa basshysy bul talap durys ekenin aıtqan" deıdi Ǵazız Mahambetov.
Azattyq radıosy "Burǵylaý jumystary basqarmasy" mekemesine habarlasqanmen ázirge jaýap ala almaǵan. Búginde mekemeniń dırektory mindetin atqarýshy Meńdibaı Qosjanov jýrnalısterdiń suraqtaryna jaýap bermeıtinin aıtyp, telefon tutqasyn qoıa salǵanyn aıtady.
Aıta keteıik, naýryz aıynda «Qazmunaıgaz» UQ» AQ jumysshylary da ereýilge shyqqan bolatyn.
