Qamaýǵa alynǵan qazaqstandyq áıel aýrýhana palatasynan tósek jaımalaryn paıdalanyp qashpaq bolǵan, dep habarlaıdy "Adyrna" ulttyq portaly Zakon.kz-ke silteme jasap.
Ol ınspektor-psıholog, ádilet leıtenanty J. esimdi kúzetshimen birge palatada bolǵan.
«Tańǵy saǵat 4 shamasynda ustalǵan azamatsha kúzetshiniń uıyqtap qalǵanyn paıdalanyp, eki tósek jaımasyn jylytý batareıasyna baılap, tereze arqyly syrtqa shyǵyp, qashyp ketken. Keıin ol ustalyp, qylmystyq-atqarý júıesi mekemesine qaıta ornalastyryldy», – dep habarlaıdy Joǵarǵy sottyń baspasóz qyzmeti.
Daý týǵyzǵan bul oqıǵadan keıin palata esiginiń aldynda kezekshilikte turǵan aǵa serjant R. jumystan bosatylǵan. Ol jumystan bosatylýyna kelispeı, QAJK-ne qarsy sotqa qaıta jumysqa ornalastyrý týraly shaǵym túsirgen.
Jergilikti sottar aryzdy qanaǵattandyrýdan bas tartyp, jumystan bosatýdyń zańdylyǵyn kórsetkenimen, Joǵarǵy sot isti qaıta qarap, serjanttyń aryzyn qanaǵattandyrdy.
«Talapker (erkek) áıeldi kúzetýge mindetti emes edi. Sebebi ereje boıynsha, eger aýrýhanaǵa kúdikti nemese aıyptalýshy áıel ornalastyrylsa, ony kúzetýge áıel kúzetshi taǵaıyndalady. Sonymen qatar, qamaýǵa alynǵan áıeldi kúzetý barysynda zań buzýshylyqtarǵa jol berilgen. Ol tory joq terezeleri bar palataǵa ornalastyrylǵan jáne jeke esigi bolmaǵan», – dep túsindirdi Joǵarǵy sot.
