Árbir áýe kompanııasynyń jolaýshylar men bagajdy tasymaldaýǵa qatysty erejeleri bar. Qyzmetkerler osy erejelerge sáıkes qyzmet kórsetedi, dep habarlaıdy «Adyrna» ulttyq portaly Informbıýroǵa silteme jasap.
7 qarasha kúni QR halyq ártisi, ánshi Maqpal Júnisova dombyrany ushaq salonyna alyp kirý kezinde qıyndyqtarǵa tap bolǵan edi. FlyArystan áýe kompanııasy ánshiniń dombyrasyn tasymaldaýǵa ruqsat bermeı, oǵan qosymsha oryn satyp alý qajettigin habarlaǵan. Áýe kompanııasynyń baspasóz qyzmeti barlyq jolaýshylar úshin tasymaldaý erejeleriniń birdeı ekenin málimdedi.
Buǵan deıin ánshiler Erkin Shúkiman men Erlan Rysqalı da, aıtysker aqyn Aısholpan Tileýtaı da osyndaı oqıǵalarǵa tap bolǵan edi.
Osyndaı jaǵdaılarǵa baılanysty Informbıýro portaly Qazaqstan aýmaǵynda ushaqpen mýzykalyq aspaptardy qalaı tasymaldaý kerektigin túsindirdi.
FlyArystan kompanııasy mýzykalyq aspaptardy qol júgi retinde alyp júrýge nemese aldyn ala satyp alynǵan jeke orynǵa ornalastyrýdy usynady. Eger mýzykalyq aspaptyń salmaǵy 5 kelige deıin bolsa jáne ólshemi 56x23x36 santımetrden aspasa, ony tegin tasymaldaı alady. Al 5 keliden 10 kelige deıingi aspaptardy aqyly túrde tasymaldaýǵa ruqsat beriledi, biraq onyń kólemi ózgerissiz qalady. Eger aspaptyń kólemi qoljúgi ólshemderinen asyp ketse, jolaýshyǵa qosymsha oryn satyp alý usynylady. Oryn almaǵan jaǵdaıda aspapty joljúk bólimine tapsyrý qajet. Degenmen mundaı jaǵdaıda FlyArystan aspaptyń qaýipsizdigine jaýap bermeıdi.
Air Astana kompanııasy mýzykalyq aspaptardy tasymaldaý kezinde qosymsha jolaýshy ornyn satyp alýdy talap etedi. Ásirese, vıolonchel nemese kontrabas sııaqty úlken aspaptar úshin bul ereje qatań saqtalady. Mýzykalyq aspaptyń salmaǵy 75 keliden jáne kólemi 120x50x30 santımetrden aspaýy kerek. Gıtara nemese saksofon sııaqty shaǵyn aspaptardy salmaǵy men kólemi standartty joljúktiń normasynan aspasa qol júgi retinde alyp júrýge bolady.
Qazaq Air áýe kompanııasy arqyly mýzykalyq aspaptardy tasymaldaý kezinde aldyn ala kelisim jasaý qajet. Qol júgi retinde 10 kelige deıingi ólshemderi 120x50x30 santımetrden aspaıtyn mýzykalyq aspapty alyp júrýge bolady. Budan úlken aspaptar úshin qosymsha oryn satyp alý talap etiledi. Al 75 keliden asatyn aspaptardy áýe kemesiniń bagaj bólimine tapsyrý qajet.
SCAT áýe kompanııasy mýzykalyq aspaptardy tasymaldaý úshin aldyn ala kelisý qajettigin málimdedi. Eger mýzykalyq aspaptyń kólemi qol júgi ólshemderinen asyp ketse, biraq 30x40x90 santımetrden aspasa, ony qosymsha otyratyn oryn alyp tasymaldaýǵa bolady. Kólemi odan da úlken aspaptardy bagaj bólimine tapsyrý kerek.
