Mońǵolııa prezıdenti Ýhnaagıın Hýrelsýh Birikken Ulttar Uıymynyń segizinshi Bas hatshysy Pan Gı Mýnǵa Mońǵolııanyń eń joǵary memlekettik marapaty – «Shyńǵys han» ordenin tabystady, dep habarlaıdy "Adyrna" ulttyq portaly Montsame agenttigine silteme jasap.
Bul marapat Mońǵolııa Ulttyq maqtanysh kúni retinde atap ótetin Uly Shyńǵys hannyń týǵanyna 862 jyl tolýyna oraı berilgen.
Marapattaý rásiminde el prezıdenti «Shyńǵys han» ordenimen halyq birligi men gúldenýin nyǵaıtýǵa, álemdik beıbitshilik pen qaýipsizdikti qoldaýǵa, Mońǵolııanyń basqa eldermen qarym-qatynasy men yntymaqtastyǵyn damytýǵa, Mońǵolııany halyqaralyq arenada ilgeriletýge, sondaı-aq elimizdiń áleýmettik, ekonomıkalyq jáne rýhanı damýyna eleýli úles qosqan otandyq jáne sheteldik memleket, qoǵam qaıratkerleri men azamattar marapattalatynyn atap ótti.
«BUU-nyń segizinshi Bas hatshysy Pan Gı Mýn álem elderiniń Turaqty damý maqsattaryn jáne Parıj kelisimin qabyldaýynda jetekshi ról atqardy. Sol arqyly ol memleketter arasynda ortaq kelisimge qol jetkizýge, adam quqyqtaryn, erkindik, ádildik jáne teńdikti nyǵaıtýǵa úles qosty. Mońǵolııa men Birikken Ulttar Uıymy arasyndaǵy yntymaqtastyqty damytýdaǵy jáne qorshaǵan ortany qorǵaý men «jasyl» damý saıasatyn ilgeriletýdegi onyń eńbegi erekshe qurmetke laıyq. Osyǵan oraı, Mońǵolııa Pan Gı Mýndy «Shyńǵys han» ordenimen marapattap, onyń eńbegin máńgi este qaldyratynyn maqtan tutady», – dep atap ótti Prezıdent Ýhnaagıın Hýrelsýh.
Sonymen qatar, prezıdent Mońǵol halqyn Uly Shyńǵys hannyń týǵanyna 862 jyl tolýymen shyn júrekten quttyqtady.
«Uly Shyńǵys han – Mońǵolııanyń táýelsizdigi men ómir súrýiniń aıǵaǵy. Ol – bizdiń birligimiz ben qundylyqtarymyzdyń sımvoly, ótkenimiz ben qazirgi jáne bolashaq urpaǵymyzdy baılanystyratyn altyn arqaý, sondaı-aq bizdiń rýhanı kúshimiz ben memlekettigimizdiń jadynan nár alatyn qaınar kózi. Uly hannyń dańqy, danalyǵy men jetistikteri álemniń damýy men gúldenýinde erekshe oryn alady. Shyńǵys hannyń murasy qazirgi álemniń qalyptasýyna tarıhı jáne baǵa jetpes úles qosty. Qazirgi ǵalymdar men tarıhshylardyń baǵalaýynsha, «Pax Mongolica» beıbitshilik pen adamzattyń turaqty damýyn qamtamasyz etý úshin elderdiń birlesken kúsh-jigeriniń negizi bolǵan progressıvti ıdealdardy qamtyǵan», – dep atap ótti prezıdent Ýhnaagıın Hýrelsýh.
