Endi meıramhanalar qyzmet kórsetý aqysyn tek mázirde kórsetilgen jaǵdaıda ǵana ala alady. Bul týraly Saýda jáne ıntegraııa mınıstri Arman Shaqqalıev bıznes ókilderimen kezdesip, qoǵamdyq tamaqtaný qyzmetterin jetildirý boıynsha usynystardy talqylady, dep habarlaıdy “Adyrna” ulttyq portaly.
Jıynda meıramhanalar men dámhanalarda kelýshilerge qyzmet kórsetkeni úshin 10% tólem alý tájirıbesiniń zańdylyǵy, sondaı-aq depozıttik júıe máseleleri qaraldy. Mınıstr Qazaqstannyń Azamattyq kodeksine sáıkes, qoǵamdyq tamaqtaný salasynda as mázirin usyný jarııa oferta bolyp tabylatynyn, sáıkesinshe, qyzmet kórsetý úshin aqy tóleý qajettiligi týraly aqparat as mázirinde kórsetilýge tıis ekenin eske saldy. Eger ondaı aqparat bolmasa, onda tólemaqy alý zańsyz dep esepteledi.
Kelýshilerge qyzmet kórsetkeni úshin zańsyz aqy alýdy boldyrmaý úshin Ishki saýda erejesine ózgerister engizildi. Endi meıramhanalar qyzmet kórsetý aqysyn tek mázirde kórsetilgen jaǵdaıda ǵana ala alady. Sondaı-aq, «depozıttik júıege» tyıym salatyn erejeler aıtyldy. Kelýshiler úshin kirý tegin bolyp qalady, alaıda qosymsha qyzmetter úshin, mysaly, VIP-kabına, karaoke-kabına úshin aqy alýǵa bolady.
Qoǵamdyq tamaqtandyrýdyń ózin-ózi retteıtin uıymynyń tóraıymy Veronıka Nurpeıisovanyń aıtýynsha, kópshilik oferta erejesine sáıkes meıramhanalar men dámhanalar mekemege kirgen kezde qyzmet kórsetkeni úshin alym tóleý qajettigi týraly kelýshilerdi habardar etedi.
“Eger kásipkerlerdiń ózderi qyzmet kórsetkeni úshin 10%-yn jınap, qunyn belgilese, mysaly, qyzmet kórsetýsiz 5500 teńge, al kórshi mekemede qyzmet kórsetýmen 5000 teńge bolsa, is júzinde baǵa birdeı bolyp qalady. Bul jaǵdaıda daıashy shaıpul talap ete almaıtynyn túsinýi mańyzdy”, – dedi ol.
Talqylaý qorytyndysy boıynsha Saýda mınıstri bıznes pen qoǵamdyq uıymdardyń ókilderin qoǵamdyq tamaqtaný salasyndaǵy erejelerdi jaqsartý boıynsha birlesip jumys istep, ashyq dıalogtyń mańyzdylyǵyn atap ótti. Ol mınıstrliktiń «Atameken» UKP-men birlesip ázirlenetin barlyq usynystardy qaraýǵa daıyn ekenin aıtty. Arman Shaqqalıev talqylaýǵa belsendi qatysqandary úshin bıznes qaýymdastyqqa alǵysyn bildirdi.
