Májilis depýtaty Qazybek Isa 12 qyrkúıek kúni ótken V Dúnıejúzilik kóshppendiler oıynyna qatysty pikir bildirdi, dep habarlaıdy “Adyrna” ulttyq portaly.
Búgin, 12 qyrkúıekte Kóshpendiler oıyny kezinde kókpar tartyldy. Oıynnyń aqtyq fınalynda Qazaqstan men Qyrǵyzstan qatar kelip, nátıjesinde ulttyq qurama altyn alǵan edi.
Ulttyq quramanyń jeńisine el turǵyndary qýanyp, súıinshiledi. Májilismen de jelidegi paraqshasynda jazba jarııalady.
“Búgingi kókpardy kórgen de armanda, kórmegen de armanda!
Dúnıejúzilik kóshpendiler olımpıadasy - kók túriktik rýh - qazaqtyń ulttyq rýhyn kóterip ketti!
Aldymen ashylýyndaǵy ǵundar men saqtardan, kók túrikter men Altyn Orda, Qazaq handyǵynan, Attıla, Tomırıs, Kúltegin-Tonykók, Shyńǵys han-Joshy handardan tartyp, Qazaq Eliniń Kók týy kókte jelbireýine deıingi kúshti kórinister rýh terbedi!
Qalyń halyqtyń rýhtanyp, dúr silkingenin kórgende osyndaı dúbirli sharalardyń mańyzy zor ekenine kóziń jetedi!
Kóshpendiler oıyny - kóshpendilerdiń qarashańyraǵy Qazaq Eline -Uly dala tósine jetti!
Kók túrikten kóktegen kók týly Qazaq Elinde - Kóshpendiler olımpıadasy dúrildep ótýde.
Dúnıejúzilik kóshpendiler oıynynyń eń shyrqaý shegi -“Qazanat” atshabaryndaǵy kókpardyń aqtyq saıysy - qazaq-qyrǵyz tartysy boldy!
Arqa tósindegi alyp atshabardaǵy aıqaı salǵan attan men uran aspan astyndaǵy aqsha bulttardyń ózin jelpip jiberip jatty…
Dál bundaı aıqaıy kúshti urandy Brazılııadaǵy fýtboldan ótken álem chempıonaty da kórgen joq shyǵar…
Qazaq-qyrǵyz kókpary naǵyz shaıqas boldy!
Qazaqtar sekildi at jalynda oınap ósken qyrǵyzdaryń da naǵyz kókjal kókparshylar eken! Oıynnyń negizgi ýaqyty teń bolyp aıaqtaldy. Birinshi taımda 3:1 esebimen jeńilip turǵan qazaqtar ekinshi taımda 4:3 esebimen jeńip turǵanda, sońǵy sekýndtarda qyrǵyzdar esepti teńestirip úlgerdi! Bul úshin qandaı jankeshtilik, qandaı rýh kerek deseıshi!?
Degenmen, Kók túrikten kóktegen Kók týly el - Kóshpendiler qarashańyraǵy - Qazaqtar báribir basymdyǵyn kórsetti.
Qosymsha ýaqyttaǵy oıynda birinshi bolyp, qazaq batyry Qurbanbek Turǵanbek Jeńis salymyn - Altyn salymdy salyp úlgerdi!
Jaraısyńdar, Qazaqtar!
Negizi, eger kókpar álemdik olımpıadaǵa kirse, tek fınalda altynǵa qazaqtar men qyrǵyzdar talasatyny anyq eken!
Al qazir - Álemdegi eń myqty kókparshylar - Qazaqtar!
Qazaq, sende arman joq!
Qazybek, sende arman joq!
Búgingi kókpardy kórgen de armanda, kórmegen de armanda!
Atshabardyń da ornalasqan jeri keremet eken! Qarsy aldyńda tulparlardyń quıǵytýy, shabandozdar kók týdy jelbiretip shaýyp bara jatqanda kókshil kúmbezderi kóz tartqan kók meshittiń kórinip turýy keremet kóz tartatyn kórinis! Ulttyq Rýhyń bıiktep, urandap ketkenińdi óziń de sezbeı qalasyń!
Kókpardyń Jeńis salymy salynǵanda, QR Parlamenti Májilisi tóraǵasy Erlan Qoshanov bastaǵan depýtattar, búkil ıppodromda otyrǵan halyq dúr kóterildi! Kók júzin kók tý jaýyp ketti!
Mine, Ulttyq rýh!
Iá, saıys barysynda qazaq kókparshysy Ulannyń qyrǵyz kókparshysynyń qasynan shaýyp ótip bara jatyp qamshy siltep qalǵany artyqtaý boldy. Soǵan qaraǵanda qyrǵyz baýyr da artyq birnárse aıtyp qalǵan bolýy kerek!? Ol úshin qazaqtyń shataq shabandozy aıyp alańynan ýaqytsha shettetilip, jazasyn aldy!
Kókparda qamshy siltenbeı qalmaıdy qaı kezde de! Óıtkeni, bul at ústindegi aıqas! Sharshy taqta ústindegi shahmat emes…
Sol qamshy siltengeni úshin ǵana kókpardy kórmeı-aq “oıyn ádiletsiz boldy” dep soǵyp jatqan ózimizdiń “ógeılerdiki” áıteýir qarsy shyǵýdy “erlik” sanaıtyn úı ishindegi “bilgishterdiń” úırenshikti ádeti ǵoı. Al qyrǵyzdar “ádiletsiz” dep jatsa, “jeńilgen kúreske toımaıdy” degen maqal bar…
“Er halyqpyz” dep júrgen qyrǵyz aǵaıyndar “Jeńilgendi moıyndaý da erlik” ekenin esten shyǵarmaýy kerek…” - delingen jazbada.
Sondaı-aq, kókpar sońynda “bári ádiletsiz ótti” degen pikirler de tolastady.
“Kókpar ádil boldy! Eshqandaı ádiletsizdik bolǵan joq! Naǵyz teketires, teń shaıqas boldy. Sonda da kúshtilik pen eptilik jeńdi! Taqymymyzdy qysyp, kóz almaı, demimizdi ishimizge tartyp qarap otyrdyq!
Bir qyzyǵy, ádiletsiz boldy dep jazyp jatqandardyń bir de bireýi kókpardy kózimen kórmegender!
Al kókpardy kózimen kórgenderdiń bir de bireýi “ádiletsiz ótti” dep jatqan joq, bári “ádil ótti” dep, rıza bolýda!
Jazda sport mınıstrligi depýtattardy jınap, Dúnıejúzilik kóshpendiler oıynyna daıyndyq barysymen esep bergende, aıtqan edim: “Birinshiden, Dúnıejúzilik Kóshpendilerdiń 5-shi oıyny túrik áleminiń qarashańyraǵynda ótip jatqanda deńgeıi buǵan deıingi tórt oıynnyń tóresindeı kúshti ótýi kerek. Ekinshiden, ózimizdiń tól ulttyq sporttarymyzdan, qazaqsha kúres pen kókpar, báıgeden altyn alýymyz kerek!” dep.
Sonyń negizgileri oryndalýda! Ashylýyn “Parıj olımpıadasynyń ashylýynan kúshti boldy” dep men emes, el jarysa jazýda.
Qazaqsha kúres pen kókpardan altyndy ádil jeńip aldyq!
Al dúnıejúzilik kóshpendiler oıynyna ketken shyǵyn Ulttyq rýhtyń dúr kóterilýimen aqtalyp tur!
Taǵy bir aıtarymyz, túıe kótergen, temir ılegen Temir Sypataı balýanymyz bastamashy bolyp júrgen “Tolaǵaı-Alyptar aıqasyn” Kóshpendiler oıynyna qosýǵa sol kezdegi Sport mınıstri Ermek Marjyqpaevqa aıtyp júrip, ózimiz úles qosyp edik. Elimizge 18 elden alyptar kelip, dúrildegen saıys ótti. 180 kılolyq alyptar kelgende kópsaıystan altyndy Túrkistan oblysynyń bahadúri Azamat Maqulbek jeńip alǵany keremet boldy!
Dúnıejúzilik kóshpendiler oıynynyń dańqy álemge tarap jatqany qýanyshty!
Ulttyq rýhymyz bıiktep, Kók týymyz kókke órleı bersin!” - dep jazdy depýtat.
