"Adyrna" ulttyq portalynda “Sarandyqtar Jańa jyldyq shyrshaǵa 29 464 285 teńge qarjy bóldi” degen taqyryppen synı maqala jaryq kórgen edi. Sol materıalǵa qatysty Qaraǵandy oblysynyń Ishki saıasat basqarmasy jaýap berdi, dep habarlaıdy "Adyrna" ulttyq portaly.
Atalǵan maqalada Qaraǵandy oblysyna qarasty Saran qalasy ákimdiginiń memlekettik aktıvter jáne satyp alý bólimi alty aı buryn bıiktigi 12 metrlik jańa jyldyq shyrshany ornatýǵa 29 464 285 teńge qarjy bólgenin, sonymen qatar, tender jeńimpazy osy qarjyǵa Suńqar stadıonynyń alańyna Jańa jyl taqyrybyna arnalǵan fotoaımaqty daıyndap, túrli jaryqtardy, boıy 5 metr bolatyn Aıaz ata men Aqshahar qoıýy kerektigin tarqatyp jazǵanbyz!
Sarandyqtardyń shilińgir shildede jańa jyldy merekeleýge arnap tender ótkizýi ne úshin qajet bolyp otyrǵanyn surap tıisti mekemege hat ta joldanǵan edi.
Soǵan jazylǵan jaýap endi jetti.
Resmı hatta kórsetilgen málimetke súıensek, sarandyqtar ótken jyldyń tájirıbesine súıenipti-mis. Byltyrǵy memlekettik satyp alýdyń kelisimsharttary birneshe ret buzyldy eken dep, bıylǵy jańa jyldyq shyrshaǵa alty aı buryn tender ótkizip tastaý qanshalyqty aqylǵa syıady?
Kishkene ǵana qalanyń ákimdigi jańa jyl jaqyndaǵanda shyrsha úshin 30 mıllıon teńgege jýyq qarjy bólse, kózge túsip, synnyń astynda qalary anyq. Sarandyqtar sol kózge túsýden qorqyp, alty aı buryn shyrshanyń qamyn jasaýǵa kirisse kerek. Biraq, olar ol aıladan da túk shyqpaǵanyn túsiner me eken?
Asyl Abaı
"Adyrna" ulttyq portaly
