Búgin - fýtbolsúıer qaýym úshin mańyzdy kún. Sebebi Almatydaǵy Ortalyq stadıonda Qazaqstan men Norvegııa quramasy kezdesedi.
6 qyrkúıek kúni 19:00-de bastalatyn oıyn úshin qala ishinde úlken keptelis túste bastaldy. Odan bólek, Almaty ákimdigi jasyl alańda ótetin oıyn kórermenderine úndeý jasady. Ákimdik pen sport basqarmasy kórermennniń bılette kórsetilgen ýaqyttan erte jınalýyn surap, habarlama joldaǵan.
«ÝEFA Ulttar Lıgasynyń matchy 6 qyrkúıek kúni saǵat 19:00-de Almatynyń Ortalyq stadıonynda ótedi. Stadıonǵa kire beriste kezek pen halyq kóp jınalmas úshin, jankúıerlerdi stadıonǵa oıyn bastalýyna eki saǵat qalǵanda kelýlerin suraımyz», - delingen habarlamada.
Bıletter bir kúnde satyldy
Qazaqstan - Norvegııa Ulttar lıgasy matchy tikeleı translıaııa arqyly Qazsport arnasynda da kórsetilmek. Alaıda quramanyń jankúıerleri men alyp satarlar bıletterdi jappaı satyp alǵan. Bıletterge ashyq satylym bastalǵannan-aq onlaın satý saıty 20 saǵattan soń isten shyqqan. Bıletter kassaǵa jetkizilmegeni týraly da aqparat taraǵan. Al 5-6 qyrkúıek kúnderi kassaǵa bılet suraı kelgen adamdy alyp satarlar kútip alyp júr. Onlaın júıelerde de bılet baǵasy 3 esege sharyqtaǵan.
«Bılet satamyn, baǵasy 30 myń teńge», «Norvegııa – Qazaqstan oıynyna bıletter 20 myń» degen jyltyr jarnama barlyq jelide júr.
Al resmı saıtta bılettiń baǵasy 2 myń men 10 myń teńge arasy dep kórsetilgen.
«Norvegııa úshin qıyn bolmaq»
Sport.kz saıtyna suhbat bergen qazaqstandyq fýtbol mamany Almas Qulshynbaev match Norvegııa quramasynyń enshisine sheshilýi múmkin dep boljady.
«Men komandalardyń jeńiske jetý múmkindigin Norvegııa quramasynyń paıdasyna 60-40 paıyzǵa deıin baǵalaımyn. Biraq matchtyń nátıjesine klımat, aýa-raıy jáne basqa da faktorlar áser etýi múmkin. Onyń ústine bul Qazaqstan úshin Cherchesovtyń jetekshiligimen emoıonaldy fon qosatyn alǵashqy oıyn. Bul Norvegııa úshin óte qıyn match bolmaq. Bizdiń komandanyń kem degende jeńilip qalmaýǵa tolyq múmkindigi bar. Eýropa chempıonatynyń irikteý oıyndary Qazaqstanda oınaý barlyǵyna qıyn ekenin kórsetti», - dedi maman.
«Ulttyq quramany qoldaýǵa kelesińder me, álde Hollandty kórýge me?»
Bas bapker Cherchesov Stanıslav pen Ulttyq qurama kapıtany Ashat Taǵybergen keshe BAQ ókilderiniń basyn qosyp, oıyn aldyndaǵy esebimen bólisken edi.
«Astana bolsyn, Almaty bolsyn, bul Qazaqstan ǵoı, bizdiń elimiz. Munda tabıǵı shóp bar, Almatyda óz artyqshylyqtary bar, Astanada óziniki. Qaı jerde bolmasyn biz jeńiske umtylamyz. Bul oıynǵa barynsha daıyndalyp jatyrmyz jáne erteń bar kúshimizdi salamyz», – dedi Taǵybergen.
Sondaı-aq, qazaqstandyqtar qarsy komandanyń oıynshylary elge kelgende kútip alyp, Hollandqa erekshe yqylas tanytqan edi. BAQ ókilderine suhbat bergen Ulttyq quramanyń kapıtany jankúıerlerge de eskertý aıtty.
«Norvegııalyq oıynshylardyń tájirıbesi eshqandaı qıyndyq týdyrmaıdy dep oılaımyn. Biz óz oıyn mánerimizdi kórsetemiz. Maǵan kópten beri habarlaspaı ketken adamdar habarlasyp menen oıynǵa bılet surap jatyr, men olarǵa: Sender ulttyq quramany qoldaýǵa kelesińder me, álde Hollandty kórýge me? deımin. Sondyqtan, biz úshin jankúıerlerdiń qoldaýy mańyzdy » – dedi Qazaqstan quramasynyń kapıtany.
Qazaqstan men Norvegııa arasyndaǵy match búgin, 6 qyrkúıek kúni saǵat 19:00-de Almatydaǵy Ortalyq stadıonda ótedi.
Symbat Naýhan
«Adyrna» ulttyq portaly
