Búgin, 15 tamyz – qazaq dalasyn ánmen terbetken vals patshasy Shámshi Qaldaıaqovtyń týǵan kúni, dep habarlaıdy «Adyrna» tilshisi.
Belgili sazger 1930 jyly 15 tamyzda Ońtústik Qazaqstan oblysy, Otyrar aýdanynda dúnıege kelgen. Onyń mýzyka ónerinde orny erekshe 300-ge jýyq áni bar.
«Ana týraly jyr»-dyń 25 nusqasyn jazǵan
«Ana týraly jyr» ániniń dúnıege kelýine anasynyń mezgilsiz dúnıe salýy sebep boldy. Bul týraly Shámshi «Anam balasynyń qyzyǵyn kóre almaı, ómirden ótti. Osy meniń janyma qatty batty. Sondyqtan ol kisige arnap bir ánniń 25 varıantyn jazdym. Eń sońynda qazir ózim ornyndaǵaly turǵan nusqasyna toqtadym»,-deıdi.
«Aq bantık» - toıǵa tartý etken án
Birde sazgerdiń Qarajan Ábilázımov esimdi dosy shańyraq kóteredi. Onyń jubaıy jańadan mektep bitirgen balaýsa qyz eken. Osyny arqaý etip, sazger «Aq bantık» ánin dúnıege ákelip, jastardyń toıynda tartý etedi.
«Qaıyqta»
«Qaıyqta» ániniń shyǵý tarıhy da qyzyq. «1957 jyly jas kompozıtorlardyń ánderinen respýblıkalyq baıqaý ótetin boldy. Birde aqyn N. Álimqulov ekeýmiz Almatydaǵy Gorkıı parkine kól jaǵasyna demalýǵa bardyq. Kól betinde ekeý – ekeý jarasqan jastar qaıyqpen terbele júzip júr. Osy bir ásem kórinis kóńilge án uıalatyp, ómirge «Qaıyqta» áni keldi»,- deıdi sazgerdiń ózi.
«Osy ánim bolashaqta gımn bolady»
Al elimizdiń ánuranyna aınalǵan «Meniń Qazaqstanym» ánin jazǵanda Shámshi 26 jasta edi. Alǵashqy oryndaýshysy - Jamal Omarova. Bul án kópshiliktiń kóńilinen birden shyǵady. Shámshi de bir sózinde «Osy ánim bolashaqta gımn bolady» degen eken. 1986 jyly jeltoqsanshylarǵa erekshe rýh bergen, olardyń urany bolǵan án 50 jyldan keıin Qazaqstannyń ánuranyna aınaldy.
Aıta keteıik, kompozıtor 1965 jyly Qazaqstan Komsomol syılyǵyn aldy. Al 1991 jyly oǵan Qazaqstan Respýblıkasynyń Halyq ártisi qurmetti ataǵy berildi.
