Aqtaýdaǵy jaǵajaılardyń birinde er adam áıeldi uryp, murnyn syndyrǵany týraly BAQ betterinde aqparat tarady, dep habarlaıdy “Adyrna” ulttyq portaly Lada-ǵa siltep.
Jeke jaǵajaılardyń birinde qurbysy, ápkesi jáne balasymen demalyp jatqan turǵynǵa belgisiz er adam shabýyl jasaǵan kórinedi. Jábirlenýshiniń sózinshe ol aýyr jaraqat alǵan.
"Olar bizdi vıdeoǵa túsirip, kúldi. Ápkem olarǵa urysyp, janjal shyqty. Ol kezde men balamen otyrǵanmyn. Sosyn jaǵdaıǵa aralasyp, olardy tynyshtandyrý úshin jandaryna keldim. Sosyn aldymnan mas er adam shyǵyp, betimnen urdy. Jerge qulap, murnym synyp, betim qanǵa boıaldy. Ol sonda da toqtamaı ura berdi", - deıdi áıel.
Oqıǵa bolǵan sátte shapa shektim degen áıeldiń ápkesi judyryq ala júgirgen er adamdy beınege túsirip alǵanyn aıtady.
"Ol onyń telefonyn tartyp alyp, teńizge laqtyryp jiberdi. Al qasynda turǵan jigitke kólikten myltyq ákelýdi buıyrdy. Osydan keıin polıııa shaqyrdyq. Sosyn ol ketip qaldy", – deıdi jábirlendim degen áıel.
Qyz aýyr jaraqat alyp, aýrýhanada bir apta boıy jatqanyn aıtty.
"Densaýlyǵyma aıtarlyqtaı zaqym keldi. Muryn synǵan, uzyndyǵy 4,5 santımetr kesilgen. Menińshe onyń qolynda ótkir zat bolǵan sııaqty. Alaıda polıeıler oǵan jeńil aıyp taǵyp otyr. Meniń oıymsha, tergeý durys júrgizilmedi. Osy ýaqyt ishinde ol keshirim suramady jáne istegen isine ókinbeıtin kórinedi", - deıdi ol.
Qazir qyzǵa qol kótergen kúdikti anyqtalǵanyn aıtady.
"Adyrna" ulttyq portalynyń tilshisine "ulyma jala japty" degen aqparatpen Aqtaý qalasynyń turǵyny habarlasty. Áıel ulynyń qyzdy urmaǵanyn aıtyp, BAQ-qa jalǵan aqparatty taratpaýdy suraıdy. Áıeldiń sózinshe,"jábirlendim" dep aıyp taqqan adamǵa uly qol kótermegen. Odan bólek, ekinshi tarap "jábirlenýshi" áıeldiń mas kúıde bolǵanyn aıtady.
"Bolmaǵandy boldy qylyp, aq degenińe qara joq qylyp halyqqa aıtyp otyr. Bul oqıǵa 06.08.24 jyly “Dostar” teńiz jaǵalaýynda oryn aldy. Jigittiń anasy, ápkesi jáne balalary demalýǵa keledi. Olar demalys aımaǵynda jalǵa beriletin átkenshekti jaldaıdy da, kezegi kelgenshe kútip otyrady. Ýaqyty kelip átkenshekke barsa, úsh mas kúıdegi áıel kisiler kezekti saqtamaı janjalmen otyryp alady. Jigittiń anasy men apasy eregis týyndatpaý úshin olardyń túskenin kútedi. Ýaqyty bitkesin eki áıel kisi oryndy bosatady. Biraq, myna vıdeodaǵy áıel oryndy bosatpaı taǵy da jaldaımyn dep urys shyǵarady.
Óz ornyn suraǵan tarapqa balaǵat sózder aıtyp, bylapyt sózderin jaýdyrady. Jigittiń anasy vıdeoǵa túsirip, átkenshekti bosatýyn suraıdy. Vıdeodaǵy áıel adam óziniń ápkesine bolǵan jaıtty aıtady. Ol kisi bizge kelip vıdeony “nege túsirdińder?-dep urys shyǵaryp, jigittiń ápkesin shashynan tartyp sýǵa tunshyqtyrady. Arasha túsken jigittiń anasyn ıterip qulatyp tóbeles bastaıdy. Ony kórgen jigit jaǵalaýdan júgirip kelip aıyrmaqshy bolady. Sol sátte vıdeodaǵy áıel ol jigittiń betinen eki ret uryp boqaýyz sózderimen jigittiń ashýyna tıedi. Ashýǵa berilgen jigit áıelge qol kóterýge májbúr bolady. Sosyn eki áıel jigittiń anasyna taǵy qol kóterip denesine zııan keltiredi. Sol sátte balalar jylap mazasyzdanǵan soń tezirek ketýdi oılaıdy. Sonda da urysty toqtatpaı vıdeoǵa túsirip “ketpeısińder”-dep artynan qalmaıdy", - dep jazylǵan jigittiń anasy taratqan habarlamada.
Áıel adam "balam bizdi qorǵamaq boldy, ol judyryqpen uryp tastamasyn dep bólip alyp kettim" deıdi.
Istiń qalaı órbip jatqany ázirge belgisiz.
