Ózbekstan bizden medal jaǵynan ozyp ketti dep janyǵyp jatqandardy túsinbedim. Ómir bolǵasyn birde ozady, birde qalady. Biz bul jetistikke baıaǵyda Sıdneı, London kezinde jetip qoıǵanbyz.
Ótkende Euronews arnasy Olımpıadanyń medal kestesin kórsetti. Sonda bir qyzyq nárse baıqadym. Negizi Olımpıada kestesinde birinshi orynǵa Qytaı men AQSh talasyp keledi. Biraq Evronıýz birinshi orynǵa Eýropalyq odaq elderin qoıypty. Iaǵnı, báriniń medalin qosqanda, tizimniń basyna shyqqan ǵoı.
Keshe ǵana Ózbekstan Olımpıadadaǵy segizinshi altyn medalin utyp aldy. Osy oraıda, nelikten túrki elderiniń medal jıyntyǵyn sanamasqa?! Bul – túrkilik tamyrymyzdy biriktirýge úles qosatyn edi. Onyń ústine, ózara alaýyzdyqty emes, yntymaqtastyqty nasıhattaıdy.
Bul jalpylama jaǵy ǵoı. Parıj olımpıadasynan mynandaı jaqsy úrdis baıqadym. Túrki elderi ózara jetistigine qýanady. Kúni keshe Eldos Smetov altynnan alqa taqqanda, búkil túrki qýandy. Sosyn Ázerbaıjan balýany jeńis tuǵyryna kóterilgende qýanbaǵan qazaq qalmaǵan shyǵar. Alataýdyń arǵy betindegi aǵaıynymyz qyrǵyzdarǵa jankúıer bolǵandar qanshama?!
Túrkııanyń mergeni Olımpıada juldyzyna aınalǵanda, nysana kózdeýden ózimiz kúmis medal alǵandaı qýandyq. Mine, bıyl ózbekter aıdy aspanǵa bir-aq shyǵaryp, 8 altyndy qorjynyna basty.
Ókinishke qaraı, Ózbekstannyń jetistigin halyqty bólip, elge iritki salýǵa paıdalanyp jatqandar da bar sekildi. Biz ózbektermen jaryspaýymyz kerek, olardyń jetistigine qýanýymyz qajet. Óıtkeni bólek memleket bolsaq ta, túbimiz bir túrkilermiz.
Sosyn Ózbekstan bizden ozyp ketti degen pikirdi kún tártibine shyǵarǵysy keletinderdi de baıqadym. Kórshimiz baıyp jatsa, qýanaıyq. Biraq shyn máninde Ózbekstan ekonomıkalyq turǵyda Qazaqstannan ozdy ma? Mynandaı statıstıka bar. Eki eldiń arasyndaǵy ózara saýda 4,4 mıllıard dollardy quraıdy. Sonyń 3,1 mıllıard dollary bizdiń Ózbekstanǵa eksportymyz.
Al Ortalyq Azııa elderindegi 11 mıllıard dollar ózara saýdanyń 8 mıllıardy Qazaqstanǵa tıesili. Ishki jalpy ónim, jan basyna shaqqandaǵy ishki ónim týraly áńgime aıtpaı-aq qoıaıyn. Munyń bári neni bildiredi? Álbette, Qazaqstannyń óńirdegi jetekshi rólin kórsetedi.
Sondyqtan joqtan ózgeni sóz qylyp, Ózbekstannan qalyp kettik degen áńgimeni qoıý kerek. Ras, medal kestesinde óz aǵamyz aldymyzda tur. Bul - ókinetin emes, qýanatyn nátıje. Sebebi Ózbekstan, Qyrǵyzstan, Túrkııa, Ázerbaıjan, Túrikmenstan jetistikke jetip jatsa, bul túrkilerdiń jeńisi. Menińshe, Olımpıadadaǵy túrki aǵaıyndarymyzǵa qýana bilsek, bul – qoǵamnyń eseıgeniniń belgisi.
Ońǵar Qabden
