Ózbekstan birinshi otandyq «Arslon» ataýymen bronetransporter (BTR) jasap shyǵardy, dep habarlaıdy “Adyrna” ulttyq portaly «Ózbekstan 24» telearnasy men Qorǵanys mınıstrliginiń baspasóz qyzmetine silteme jasap.
BTR-dy Krantas Group jeke kompanııasy qurastyrǵan. Jabdyq NATO standarttaryna sáıkes jasalǵan.
BTR qaýipti aımaqtarda arnaıy tapsyrmalardy oryndaıtyn 11 adamǵa deıin (úsh ekıpaj múshesi jáne segiz desantshy) jeke quramdy tasymaldaýǵa arnalǵan áskerı kólik. Onyń salmaǵy 32 tonnadan 35 tonnaǵa deıin bolady. Aldyńǵy bóligi qorǵanystyń maksımým, altynshy klasy boıynsha, búıirlik jáne artqy bólikter - tórtinshi klasy boıynsha jasalǵan. BTR 30 mm zeńbirekpen jáne 7,62 mm pýlemetpen jabdyqtalǵan, mınadan qorǵaný trotıl ekvıvalentinde 10 kg-dy quraıdy.
«Arslon» zamanaýı urys modýline ıe, kúndiz de, túnde de kez kelgen klımattyq jaǵdaılarda jaýyngerlik tapsyrmalardy oryndaı alady, alys jáne jaqyn qashyqtyqtaǵy nysanaǵa dál tıgizýde atys qoldaýyn qamtamasyz etedi.
Jaqyn arada Ózbekstan qarýly kúshterine «Arslon» bronetransporteri jetkiziledi. Armııa sonymen qatar jeke quramdy tasymaldaýǵa jáne qaýipti aımaqtarda arnaıy tapsyrmalardy oryndaýǵa arnalǵan jeńil brondy Tarlon-M kóliginiń tórtinshi nusqasyn alady.
«Tarlon-M» mobıldi toptardy, baqylaý-ótkizý pýnktteri men jaýyngerlik patrýlderdi atyspen qamtamasyz etý, áskerler men avtokólik kolonnalaryn jaýyngerlik qorǵaý, ekıpaj ben áskerlerdi atys qarýynan qorǵaý úshin qoldanylady.
