Qazaq Oil janarmaı beketi ár kólikten belgilengen mólsherlemeden 5-10 lıtrden artyq benzın kórsetip, zańsyz paıda taýyp otyrýy múmkin. Bul týraly jýrnalıst Arman Áýbákir Facebook paraqshasynda jazdy, dep habarlaıdy “Adyrna” ulttyq portaly.
Jýrnalıstiń aıtýynsha, janarmaı beketi ár kólikten zańsyz paıda taýyp otyrýy múmkin. Sondaı-aq, ol oqıǵa bolǵan ornynan vıdeo joldady.
“Kúni keshe Hantaý aýylynan (Jambyl oblysy, Moıynqum aýdany) Almatyǵa kele jatyp, Býrybaıtal degen jerde Qazaq Oil janarmaı beketine toqtadyq. Týystar bolyp eki kólikpen kele jatqan edik. Qanat esimdi júrgizýshimiz “70 lıtrlik bagyma 72 lıtr benzın quıyldy. Ishinde 10-15 lıtr benzın onsyz da bar edi. Hantaýǵa jetkenshe jarty bag benzın bolǵan. Sonda 10-15 lıtr artyq benzın qaıda quıyldy?” dep shaǵymdandy. Kelesi kezekti Qaldybek esimdi ekinshi júrgizýshimiz de týra sondaı másele kóterdi. “Kóliktiń bagy - 80 lıtr. Biraq myna janarmaı beketi 88 lıtr benzın quıyp jiberdi. Kóligim gazben júretindikten 10-15 lıtrdeı benzınim qoldanylmaı únemdelip turǵan. 80 lıtrlik bagqa 90 lıtrdeı benzındi qalaı quıyp jiberdi? Soǵan ashýym kelip tur” deıdi ol. Operator “qyz meniń bul máselege qatysym joq, tek benzın quıý tetigin basamyn, qalǵan suraqtaryńyzdy basshylarǵa qoıyńyz. Koll entrge habarlasyńyz” dedi. Koll entrge habarlasyp edik, bárin tyńdap alyp “benzın ólsheıtin qazir masterdi joldaımyz” dedi. Biraq jarty saǵat kúttik, kelmedi. Aıdalada turǵan janarmaı beketine jyldam eshkim kele qoımas. Jolymyzdan qalmaıyq dep ármen qaraı uzaq kúte almaı júrip kettik.
Qalt-qult etip júrgen qanshama jurt túrli-túrli alaıaqtarǵa tap bolýda. Eger ár kólikten 5-10 lıtrden artyq jep otyrsa, kezek-kezek kelip turǵan kólikterden zańsyz paıdanyń astynda qalyp otyrǵan joq pa? Quzyrly organdar bir tekserýi kerek dep esepteımiz”, dep jazdy ol.
