Bıyl 181 myń talapker qatysqan biryńǵaı ulttyq testileýde 140 ball jınap, sońǵy úsh jylda bolmaǵan rekordty ornatqan Jannur Eńsebek pen Aıym Erjanova óz qujattaryn SDU ýnıversıtetine tapsyrdy, dep habarlaıdy “Adyrna” ulttyq portaly.
Almaty oblysy, Talǵar aýdany, Qarabulaq aýylynyń №22 jalpy bilim beretin orta mektebiniń túlegi Jannur Eńsebek óz tańdaýyn oqý jylynyń basynda jasap qoıǵan eken. Bul týraly ol “Adyrna” tilshisine bergen suhbatynda aıtqan bolatyn. Sondyqtan da grant konkýrsyna ótinish qabyldaý kezeńiniń alǵashqy kúninde-aq «Altyn belgi» ıegeri tańdaý paraǵynda tek SDU-dy belgilep, qujattaryn tapsyryp ketti.
Dál osyndaı úzdik nátıjege qol jetkizgen Aqmola oblysy Qosshy qalasyndaǵy R.Qoshqarbaev atyndaǵy №1 mekteptiń túlegi Aıym Erjanova da SDU ýnıversıtetin tańdady. 140 jınaǵan Aıym týraly “Adyrna” materıalynda tarqatqan edik.
Eske sala keteıik, 2018 jyly 140 ball jınaǵan Shıara Qudaıbergenova da SDU-dyń túlegi atanǵan.
