Ózbekstannyń tuńǵysh prezıdenti Islam Karımovtyń qyzynyń qamaýǵa alynǵanyna 10 jyldan asty. Sot úkiminen keıin túrmede jazasyn ótep jatqanyna 9 jylǵa jýyqtady. Túrmede qozǵalǵan taǵy bir is boıynsha ol uzaq merzimge sottalǵaly birneshe jyl boldy. Sońǵy jazasyn óteý merzimi 2033 jyly aıaqtalady. Túrmedegi Gúlnara Karımova qazir jazasyn qalaı ótep jatyr?
Ózbekstannyń tuńǵysh prezıdentiniń qyzy 52 jastaǵy Gúlnara Karımova alǵash 2013 jyly qamaýǵa alynyp, qazir Tashkent oblysynyń Záńgi-ata aýdanyndaǵy áıelder kolonııasynda jazasyn óteýde. Ol mekeme basshylyǵy úshin "bas aýrýyna" aınaldy, dep habarlaıdy Ozodlıqqa silteme jasap «Golos naroda».
2015 jyly 18 jeltoqsanda Gúlnara Karımovany Tashkent qalalyq soty – 10 jylǵa, al 2020 jyly 18 naýryzda jańa qylmystyq is sheńberinde 13 jylǵa bas bostandyǵynan aıyrdy. Oǵan qastandyq, bopsalaý, jymqyrý jáne tonaý qylmystaryn jasady dep aıyp taǵyldy.
«OL ÓZIN JAMAN SEZINBEIDI»
VIP-tutqyn Gúlnara Karımovanyń túrmedegi búligi týraly BAQ-tyń habarlamalaryna túsinikteme bere otyryp, mekeme ókili anonımdik sharttarmen basylymmen suhbattasqan. Ózbekstandaǵy jalǵyz áıelder túrmesi – Záńgi-ata aýdanyndaǵy №21 kolonııa qyzmetkeri "mekeme basshylary Gúlnara Karımovanyń minez-qulqy men basqa tutqyndarǵa qatysty arandatýshylyqtary týraly joǵary basshylyqqa birneshe ret júginýge májbúr boldy" deıdi.
Tashkent oblysynyń Záńgi-ata aýdanyndaǵy áıelder kolonııasynyń burynǵy tutqyndarynyń biri bloger Kırıll Altmanǵa bergen suhbatynda Gúlnara Karımovanyń túrmede "búlik shyǵarǵany" týraly aıtqan.
«Bir kúni bylaı boldy. Ol jumysqa shyǵady. Sol kúni ol búlik shyǵarady. Sonda ony 2,5 saǵattaı tyńdap turyp qalady. Múmkin ol ózin qalaı sottaǵanyn aıtqan shyǵar. Ony bul jerge otyrǵyzbaý kerek edi, biraq qamaǵannan keıin, meniń oıymsha, rejımdi azdap saqtaǵany durys bolar edi. Biraq ol ony oryndamaıdy», - deıdi burynǵy tutqyn.
Áıelder kolonııasynda jazasyn ótegen burynǵy tutqyn Altmanmen áńgimelesý barysynda Gúlnara Karımovanyń narazylyq akııasynyń ýaqyty men kúnin aıtpady. Burynǵy sottalýshy blogerdiń suraqtaryna jaýap bere otyryp, Gúlnara Karımova úshin túrmede VIP-sharttar jasalmaǵanyn, kerisinshe, ol jalpy otrıadta jazasyn ótep jatqanyn atap ótti.
«Alaıda onyń aınalasyn jaımamen qorshap tastaǵan tórt tósegi bar. Ol kádimgi ashanadan tamaq ishpeıdi, ózine syrttan jeke tamaq ákeledi. Oǵan kóptep sálemdeme keledi. Eshkim joq kezde áldebir kólikter kelip, onyń keregin 5-10 kılolap emes, molynan ákelip beredi. Eger ol birdeńeni qalasa, oǵan qol jetkize alady. Birde ol bir sottalýshyny kórgisi kelgen. Sony basqa otrıadtan shaqyrtyp aldy. Bir sózben aıtqanda, ol ózin jaman sezinbeıdi», - deıdi burynǵy tutqyn. Basylym sóılesken áıelder kolonııasynyń basqa burynǵy tutqyndary da jaǵdaıdy osylaı sıpattady.
BELGISIZ MÁLIMETTER JÁNE BÚLIKShIL TUTQYN
2023 jyldyń kúzinde Gúlnara Karımovanyń úı qamaǵyna alynǵany týraly beıresmı aqparat paıda bolǵan edi. Mundaı derektiń taraýyna qyzy Imannyń Ulybrıtanııadan Ózbekstanǵa jıi kelýi sebep boldy.
Kezinde derekkózder Gúlnara Karımova ýaqytynyń kóp bóligin úıde ótkizetinin jáne qajet bolǵan jaǵdaıda ǵana túrmege keletinin málimdegen. Alaıda bul habar resmı rastalǵan joq.
Jýrnalıspen sóıleskende aty-jónin ataǵysy kelmegen №21 áıelder kolonııasy qyzmetkeriniń aıtýynsha, Gúlnara Karımovanyń máselesi osy mekeme ákimshiligi úshin naǵyz bas aýrýyna aınalǵan. Alaıda, suhbattasýshy Gúlnara Karımovanyń úı qamaǵyna alynǵandyǵy týraly habarlamaǵa jaýap bergen joq.
Áıelder kolonııasy qyzmetkeriniń aıtýynsha, Gúlnara Karımovanyń týystarymen kezdesýinde eshqandaı artyqshylyq joq. Oǵan zańdy túrde týystarymen kezdesýge ruqsat etilgen. Biraq kezdesý ýaqytynda ony kórýge eshkim kelmegen.
"Mekeme basshylary Gúlnara Karımovanyń minez-qulqy men basqa tutqyndarǵa qatysty arandatýshylyqtary týraly birneshe ret joǵary basshylyqqa júginýge májbúr boldy. Bizge, jedel qyzmetkerlerge, ony ustaýda saq bolýdy tapsyrdy. Sondaı-aq, "oǵan erekshe qaramaý" kerektigi de eskertildi», - deıdi Záńgi-atadaǵy áıelder kolonııasynyń qyzmetkeri.
Basqa da derekkózder Ózbekstannyń tuńǵysh prezıdenti Islam Karımovtyń qyzy túrmede jıi narazylyq akııalaryn ótkizetini týraly aqparatty rastady. Sondaıda mekeme basshylary birneshe ret jazany oryndaý departamentine jáne arnaıy prokýratýraǵa júginýge májbúr bolǵan.
Ózbekstannyń qylmystyq-atqarý kodeksiniń talaptaryna sáıkes, qazirgi ýaqytta Gúlnara Karımovany basqa kolonııaǵa aýystyrý nemese shartty túrde merziminen buryn bosatý merzimderi ótip ketti.
Málimetterge qaraǵanda, Gúlnara Karımova memleket pen azamattardyń múddelerine 1 trln 270 mlrd 200 mln somdy, 1 mlrd 651,8 mln AQSh dollaryn, 26,1 mln eýrony quraıtyn zalal keltirgen. Ol 2019 jyldyń kókteminen bastap Tashkent oblysynyń Záńgi-ata aýdanyndaǵy №21 áıelder kolonııasynda jazasyn ótep jatyr.
