Belgili ánshi Qaırat Nurtastyń anasy, prodıýseri Gúlzıra Aıdarbekova sońǵy jaǵdaılarǵa qatysty pikir bildirdi, dep habarlaıdy “Adyrna” ulttyq portaly.
Prodıýser Gúlzıra Aıdarbekova jelidegi jazbasynda ánshi Qaırat Nurtastyń qamaýǵa alynǵanynan keıin óziniń qandaı kúıde bolǵanyn jazdy.
"Túske deıin "anasy qandaı kúıde" dep mazalaýǵa yńǵaısyzdyq tanytyp, sizderdiń de júrekterińiz tynym bermeı, tús aýa qońyraýlar men smster esh toqtaǵan joq. Iá, jýrnalısterge de haıp tabylyp, biri "saýap boldy" dep kúlkige qaryq bolyp, jandary rahattanyp oılaryna kelgenin jazsa, 90 paıyz halyq janashyrlyqpen júrekteri jylap jatty. Alǵashynda "túnnen aman shyǵam ba, joq pa" dedim ras, qur súldem qalǵandaı, janarym bir núktege qadalyp, uzaq otyrdym, ishim órtendi, kúıdim-jandym, ras. Joldasymnyń, bala-shaǵa, aǵaıyn, dostarymnyń ýaıymy ulymnan buryn men bolǵanymdy da sezindim. Bolmaǵan soń Núrekeń telefon soǵyp urysa bastady: "Eldiń balalarynda odanda aýyr synaq bolyp jatqandary bar, er azamat bolǵan soń basynan bári ótedi, eńseńdi kóter, sen myqty bolýyń kerek" dep. Qazir bárin oılap, oıym jan-jaqqa shashyrańqy bolyp turǵany ras. Sonda da bolsa, ulymnyń sot proesi bastalysymen kómekshisine qarap, "mamam jylamasynshy" dep ymdap túsindirip jatqanyn kórip, kózimniń jasyna erik berdim, biraq ulyma kórsetpedim", - dedi prodıýser Aıdarbekova.
Gúlzıra Aıdarbekova ánshi Qaıratty sotqa bergen óziniń jaqyn dosy ekenin de jaıyp saldy.
"Janyna jaqyn ustap, ústindegi kıimderine deıin sheship berip, qımas dúnıesi men aqshasyna deıin bólisip, baýyrym dep jaqyn tutyp júrgen dosy, bir sátte jaýyna aınalady dep kim oılaǵan. "Meniń de kórgenim kóp balam, bárine aq júregińmen senim artyp, janyńa jınap, úıge alyp kele bermeshi" dep aıtqan kezderim de joq emes, onyń ústine kóp nárseniń qurbany bolýǵa el aldynda júrgeniniń de áseri tıerin ana júregim sezbeıdi emes. Ulyma bar tilerim: saǵy synbaı, júzinde muń bolmaı, Alla amandyq pen sabyr bersin! Al sizderge tilerim: eshbir anany qudaı balasymen synamasyn", - dedi ánshiniń anasy.
