"Jasyl Damý" AQ málimeti boıynsha 2022-2023 jyldary jınalǵan ýtıl alymnyń jalpy somasy 447,3 mlrd teńgege jetken, dep habarlaıdy “Adyrna” ulttyq portaly QazAqparatqa silteme jasap.
Aqparaltqa sáıkes, qalǵan 20,8 mlrd teńge — taýarlar men qaptama úshin alynǵan tólem. Sondaı-aq, tólemderdiń jartysyna jýyǵy kólik quraldaryn ımporttaýshylardan túsken (201,86 mlrd teńge).
Avtomobıl naryǵyn monıtorıngileý jáne taldaý agenttiginiń dırektory Artýr Mıskarıannyń atap ótýinshe, jınalǵan ýtılalym somasy (426,49 mlrd teńge) 2022 jáne 2023 jyldy tolyq qamtymaıdy. Atalǵan soma óndirilgen jáne ımporttalǵan tehnıkanyń sanyna, sondaı-aq stavkalardyń mólsherine tikeleı baılanysty.
Sonymen qatar, 2022 jyly ýtılalymdy qabyldaý men ákimshilendirýde úzilis boldy, bul bir jyldaǵy qorytyndy kórsetkishterge áser etti.
"Óndirýshiler ımporttaýshylarmen birge ýtılalymdy tolyq kólemde tóleıdi. Sodan keıin yntalandyrý erejeleri boıynsha engizilgen somalar tehnıka óndirýshileriniń qarsy mindettemelerin saqtaý ornyna qaıtarylady. Tıisinshe, ýtılalym somasy Qazaqstanda shyǵarylǵan tehnıkanyń baǵasyna engizilmeıdi. Osylaısha, ımporttyq tehnıkadan baǵalyq artyqshylyq qamtamasyz etiledi jáne el ishinde óndiristi damytý úshin jaǵdaılar jasalady", - dep túsindirdi sarapshy.
Sondaı-aq, maman jınalǵan ýtılalym somasy birneshe ekologııalyq baǵyttar boıynsha jumsalatyndyǵyna baılanysty ekologııalyq jaǵdaıdy jaqsartý múmkindikteriniń spektri stavkanyń mólsherine baılanysty ekenin málim etti.
