Qazaqstannyń Tótenshe jaǵdaılar mınıstrligi Qyrǵyzstanǵa selden qaza tapqan balalardy tasymaldaý úshin bort jibermek, dep habarlaıdy “Adyrna” ulttyq portaly vedomstvonyń baspasóz qyzmetine siltep.
«Barlyq qajetti úılestirý jáne aqparat almasý jumystary júrgizilýde. Qaza tapqandardyń máıitterin tasymaldaý úshin Qazaqstannyń Tótenshe jaǵdaılar mınıstrligi Osh qalasyna ushaq jóneltý máselesin qarastyrýda», - delingen habarlamada.
Qyrǵyzstannyń Tótenshe jaǵdaılar mınıstrliginiń habarlaýynsha, Osh oblysy Nookat aýdany Abshyr-Ata aýylynda sel saldarynan kámeletke tolmaǵan eki Qazaqstan azamaty qaza tapqan. Taǵy ekeýi iz-túzsiz joǵalǵan dep aıtyldy.
Olardy Qyrǵyzstannyń qutqarýshylary izdestirip jatyr.
«Qazaqstandyq dıplomattar jergilikti bılikpen turaqty baılanysta. Bizdiń Qyrǵyzstandaǵy Elshiligimiz qaıtys bolǵan balalardyń týystaryna barlyq qajetti kómekti kórsetedi. Bul qaıǵyly oqıǵa Qazaqstan Respýblıkasy Syrtqy ister mınıstrliginiń erekshe baqylaýynda», - dep habarlady Qazaqstan Respýblıkasy Syrtqy ister mınıstrligi.
QR Mınıstri Murat Nurtileý áriptesi mınıstr Jeenbek Qulybaevqa telefon shaldy. Olar tótenshe jaǵdaıdyń mán-jaıyn jáne eki eldiń tıisti memlekettik organdarynyń ózara is-qımylyn talqylady.
