Qazaqstan prezıdenti Qasym-Jomart Toqaev qumar oıynǵa táýeldilikke qarsy zańǵa qol qoıýǵa daıyn. Bul týraly ol búgin, 27 maýsymda aıtty, - dep habarlaıdy “Adyrna” portaly.
Memleket basshysy oıynǵa táýeldilikti otbasyn qurtatyn kúrdeli másele dep sanaıdy.
«Eń qaýipti áleýmettik keseldiń biri – lýdomanııa. Qumar oıynǵa táýeldilik kóptegen azamatty orǵa jyǵyp, qaryzǵa belshesinen batyrady, otbasynyń shyrqyn buzady, qylmysqa, sýııdke ıtermeleıdi. Internet damyǵan saıyn lýdomanııa problemasy ýshyǵa tústi jáne naǵyz áleýmettik indetke aınala bastady. Bul ultymyzdyń bolashaǵyna qater tóndiredi. Sondyqtan Memleket basshysy retinde men osy qaýipti qubylyspen kúresý úshin birqatar pármendi sharalar qabyldadym” dedi Prezıdent.
Sondaı-aq, ol zańǵa qol qoıýǵa daıyn ekenin jetkizdi:
“Byltyr kúzde osy másele boıynsha Qaýipsizdik Keńesiniń arnaıy otyrysy ótti. Jýyrda meniń tapsyrmammen Úkimet Zańsyz oıyn bıznesi men lýdomanııaǵa qarsy is-qımyl jónindegi keshendi jospardy bekitti. Sonymen qatar tıisti zań jobasyn tez arada qabyldaý jóninde buǵan deıin birneshe ret aıtqan edim. Al búgin Senat lýdomanııaǵa qarsy zań jobasyn qaraıdy. Eger maquldansa, kóp uzatpaı men oǵan qol qoıamyn. Atalǵan Zańnyń kúshine enýi azamattarymyzdy, eń aldymen, óskeleń urpaqty osy zııandy áleýmettik dertten saqtaýǵa múmkindik beretinine senimdimin. Oraıly sátti paıdalana otyryp, máselege beı-jaı qaramaı, zań jobasyn jedel ári sapaly ázirlegeni úshin Májilis pen Senat depýtattaryna alǵys aıtqym keledi» dedi ol.
