21 maýsym kúni Parlament palatalarynyń birlesken otyrysynda depýtattar 2023 jylǵy respýblıkalyq bıýdjettiń atqarylýy týraly Úkimet pen Joǵary aýdıtorlyq palatanyń esepterin bekitti, dep habarlaıdy «Adyrna» tilshisi.
Úkimettiń baspasóz qyzmetiniń málimetinshe, respýblıkalyq bıýdjet kiristeriniń jyldyq jospary 99,9 paıyzǵa (19 trln teńge) oryndalǵan. Jyldyq ınflıaııa 2 esege tómendep, 9,8 paıyzdy qurady. Jyl qorytyndysy boıynsha naqty ekonomıkalyq ósim 5,1 paıyz bolǵan.
Bul rette respýblıkalyq bıýdjetke (1,4 trln teńge) jáne Ulttyq qorǵa (1,6 trln teńge) túsetin salyqtardyń tapshylyǵy baıqalyp otyr. Úkimettiń qaryzy 2024 jyldyń 1 qańtaryndaǵy jaǵdaı boıynsha 25 trln teńgeni qurady. Onyń 72 paıyzy – bıýdjet tapshylyǵyn qarjylandyrýǵa paıdalanylatyn ishki qaryzdar.
2023 jylǵy ıgerilmegen shyǵystar 73 mlrd teńge boldy. Al bıýdjet qarajatynyń tıimsiz paıdalanylýy 489 mlrd teńgeni qurady.
Premer-mınıstr Oljas Bektenovtiń aıtýynsha, ekonomıkalyq kórsetkishterdiń jetkiliksizdigine birneshe faktor sebep bolyp otyr.
«Ósý qarqynyna kúrdeli geosaıası jaǵdaı men saýda seriktesterimizdiń naryǵyndaǵy ahýal syndy birneshe parametr kedergi keltirýi múmkin. Biraq, soǵan qaramastan, Úkimet óz maqsatyna jetý úshin barlyq rezervtik múmkindikterdi biriktiredi. Biz qazir saýdada kórsetkishterdiń birshama tómendegenin kórip otyrmyz. Bul, árıne, sý tasqyny men basqa komponentterdiń saldary, biraq bul kórsetkishterdi birtindep turaqtandyramyz. Boljamymyz boıynsha, ekonomıkamyzdyń keıbir salasy ósý úshin úlken áleýetke ıe bolady. Bul qurylys, ınfraqurylym, jóndeý jumystary, sondaı-aq óńdeý salasy. Úkimet bul salalardy aýqymdy túrde qoldaıdy»,—dedi ol.
Premer-mınıstr aýyl sharýashylyǵy salasyn qarjylandyrýdy 4 ese arttyrý josparlanǵanyn atap ótti.
«540 mıllıard teńge aýyl sharýashylyǵy óndirýshilerimizge baǵyttalady. Otandyq óndirýshini qoldaý — Úkimet úshin óte mańyzdy jáne negizgi tirek núkte»,—dep tolyqtyrdy Bektenov.
