«Atamura» korporaııasynyń prezıdenti, baspager Qul-Muhammeb Raqymǵalı áleýmettik jelidegi paraqshasyna qoǵam qaıratkeri, ǵalym Murat Áýezovti eske alyp jazba jarııalady, dep habarlaıdy “Adyrna” ulttyq portaly.
Estelikke toly jazbanyń tolyq nusqasyn usynamyz.
Ardaqty aǵaıyn, búgin tulpardyń tuıaǵy, jaqsynyń ózi - Murat Muhtaruly Áýezovti sońǵy saparǵa shyǵaryp saldyq. Murat aǵa 80 jasqa tolǵanda “Atamura “ baspasynan “Qazaq rýhy”, ”Órteńde óngen gúl” jáne “Murat” atty kitaptaryn jaryqqa shyǵaryp, batasyn alǵan edim. Murat aǵanyń anasyna arnalǵan “Órteńde óngen gúl” kitabynyń alǵy sózin Muhtar aǵamyz jazyp,tusaýkeser rásimin Ulttyq kitaphanada ótkizgen edik.
Tusaýkeserge Murat aǵa, Tóregeldi aǵa, Oljas aǵamyz, Qazaqstan Jazýshylar odaǵynyń tóraǵasy Mereke Qulkenov aǵalarymyz bastaǵan zııaly qaýym ókilderi,sondaı-aq Súleev, Jansúgirovter áýletiniń urpaqtary qatysyp, joǵary deńgeıde ótip edi. Ásirese, Murat aǵa sol kúnderi dostaryn, týystaryn kórip bir jasap qalǵan edi.
Al “Qazaq rýhy” kitabynyń tusaýkeserin Murat aǵanyń usynysymen Abaı oblysynyń ortalyǵy Semeı qalasyndaǵy Muhtar Áýezov atyndaǵy ped.kolledjde ótkizdik. Bul kitaptyń da alǵy sózin Muhtar aǵamyz jazdy.
Sol kezderde Murat aǵa meni ózine arnaıy shaqyryp, “Raqymǵalı baýyrym, byltyr elde bolyp qaıttym, sońǵy kezde densaýlyǵym syr berip júr, qazir el jaqqa bara almaıtyn sııaqtymyn. Myna kitaptyń tusaýkeserin Semeı qalasynda ótkizseńder óte durys bolar edi, ózderiń baryp qaıtarsyńdar” dep Zıfa-Alýa apaıymyz bastaǵan bir top adamnyń tizimin kórsetti, ishine meni de qosypty.
“Meniń myna sálemimdi eldiń aldynda ózińniń oqýyńdy suraımyn”- dep, sońyna qolyn qoıǵan úsh bet qaǵazdy maǵan usyndy.
Biz aǵanyń amanatyn buljytpaı oryndadyq. Abaı oblysynyń basshylyǵy men ıgi jaqsylary bizdi óte jaqsy qarsy aldy.
Taǵy bir kúni Murat aǵa habarlasyp nemeresi Alannyń týǵan kúnine shetelge bara jatqanyn aıtyp, qandaı syılyq jasaýǵa bolady dep surady. Men birden dombyra syılaýdy usyndym jáne kishkentaı balalarǵa arnalǵan arnaıy fýtlıarymen dombyralar bar ekenin, ony ózim ákep beretinimdi aıttym.
Osylaısha Jolaýshy aǵamyzdyń arnaıy balalarǵa laıyqtap jasaǵan dombyrasyn qorabymen aǵamyzdyń qolyna tabystadym. Aǵamyz dombyrany ustap turyp, “al endi, Raqymǵalı baýyrym, osyny alǵashqy bop óziń tartyp, bir aýyz “áý” deseńshi demesi bar ma. Sol- aq eken, aǵamyzdyń kómekshisi Ernat telefonnyń kamerasyn maǵan buryp túsirgeli jatqanyn baıqadym da, dereý dombyrany qolyma alyp, sýyryp salyp eki-úsh shýmaq qurap jiberdim. Aǵamyz qol shapalaqtap, balasha qýanyp edi.
Artynan aǵamyzben qońyr tús túraly, dombyra týraly uzaq áńgimelestik.
Keshe keshke Almaty qalasynyń ákimshiligi uıymdastyrǵan “Jalyn” meıramhanasynda aǵamyzdyń qonaq asy berilip, búgin Muhtar Áýezov atyndaǵy teatrda ,qasıetti Qurban aıt kúni qoshtasyp, aqtyq saparyna shyǵaryp saldyq. Murat Muhtarulyna ákesi uly jazýshy Muhtar Omarhanulynyń qasynan jer buıyrypty. Janyńyz jánnatta bolsyn, ardaqty aǵa.
Sońǵy kezde elimizdiń ıgi jaqsylary, zııalylary azaıyp bara jatqandaı kórinedi…
Keshe ǵana akademık Tóregeldi Sharmanuly ómirden ótse, búgin Murat Muhtarulymen qoshtastyq.
Ultymyzdyń maqtanyshyna aınalǵan at tóbelindeı ardaqty aǵalarymyz aman bolsa eken!
Qul-Muhammed Raqymǵalı
«Atamura» korporaııasynyń prezıdenti
